काठमाडौं – राजावादी आन्दोलनपछि फरार घोषित दुर्गा प्रसाईं सञ्चालक रहेका दुईवटा अस्पतालका रोक्का गरिएका बैंक खाता फुकुवा गर्न सर्वोच्च अदालतले अन्तरिम आदेश जारी गरेको छ ।
तीनकुनेमा गत चैत १५ गते भएको आन्दोलनका क्रममा दुईजनाको ज्यान गएको थियो भने सरकारी तथा निजी सम्पत्तिमा आगजनी र तोडफोड भएको थियो । घटनापछि आन्दोलनका जनकमाण्डरका रूपमा चिनिएका प्रसाईं फरार भएका थिए । त्यसलगत्तै उनको व्यक्तिगत खाता सहित वि एण्ड सी मेडिकल कलेज टिचिङ्ग हस्पिटल एण्ड रिसर्च सेन्टर प्रालि र र्वाञ्चल क्यान्सर हस्पिटल प्रालिका खाता समेत रोक्का गरिएको थियो ।
अस्पतालका खातामा रोक्का लगाइएपछि दुवै संस्थाको तर्फबाट डा. अञ्जली कार्कीले छुट्टाछुट्टै रिट दायर गरेकी थिइन् । रिटमा उनले नेपाल प्रहरी, केन्द्रीय अनुसन्धान ब्युरो (CIB) लाजिम्पाटसहित १८ र १४ जनालाई विपक्षी बनाएकी थिइन् । सुनुवाइ गर्दै न्यायाधीश हरिप्रसाद फुयालको एकल इजलासले दुवै अस्पतालका खाता फुकुवा गर्न अन्तरिम आदेश दिएको हो ।
साथै, सर्वोच्चले खाता रोक्का गर्ने निर्णयमा संलग्न विपक्षीहरूलाई कारण देखाउन आदेशसमेत जारी गरेको छ ।
