समाचार सुन्नुहोस :
काठमाडौँ – सरकारी शिक्षकहरूले अनिश्चितकालीन हडतालको पाँचौं दिन आज काठमाडौंमा सिटी जुलुस प्रदर्शन गरेका छन्। आफ्नो माग पुरा गराउन दबाब दिन उनीहरूले माइतीघर मण्डलाबाट नयाँ बानेश्वरसम्म सिटी जुलुस निकालेका हुन्।
सिटी बजाउँदै र नाराबाजी गर्दै जुलुसमा सहभागी शिक्षकहरू प्रदर्शनमा उत्रिएका हुन्। आन्दोलनरत शिक्षकहरूले सरकारले आफूहरूको माग बेवास्ता गरेकाले दबाबस्वरूप सडकमै उत्रनुपरेको बताएका छन्। उनीहरूले शिक्षा क्षेत्रको समस्या समाधान गर्न सरकारसँग पटक–पटक आग्रह गरिए पनि सुनुवाइ नभएको गुनासो गर्दै आन्दोलन अझ सशक्त बनाउने चेतावनी दिएका छन्।
यसअघि पनि उनीहरूले शैक्षिक सुधार, सेवा सुरक्षालगायत माग राख्दै शिक्षण कार्य बहिस्कार गरेका थिए। प्रदर्शनका कारण देशभरका विद्यालयको पठनपाठन प्रभावित हुँदै आएको छ। सरकार र शिक्षकबीच वार्ता प्रयास भइरहे पनि सहमति नजुटेपछि आन्दोलन लम्बिँदै गएको हो।
