समाचार सुन्नुहोस :
काठमाडौँ – नेपाल विद्युत् प्राधिकरणको कार्यकारी निर्देशक पदबाट हटाइएका कुलमान घिसिङले केही स्वार्थी समूहले आफूमाथि प्रहार गरेको बताएका छन्। शुक्रबार काठमाडौंमा आयोजित पत्रकार सम्मेलनमा उनले, “जनतालाई उज्यालो दिनु राष्ट्रद्रोह हो त?” भन्ने गम्भीर प्रश्न गर्दै आफ्नो बर्खास्तीप्रति असन्तोष व्यक्त गरे।
लोडसेडिङ अन्त्य गरी प्राधिकरणको आय–व्यय सुधार गर्न योगदान दिएको भन्दै घिसिङले आफूलाई हटाउने निर्णय सत्ताका नजिक रहेका व्यापारिक समूहहरूको दबाबमा गरिएको आरोप लगाए। उनले विद्युत प्राधिकरणको नेतृत्व गर्दा २० अर्ब रुपैयाँ महसुल नतिर्ने व्यापारीहरूले अनावश्यक विशेष सुविधा लिएको भन्दै त्यसविरुद्ध उभिँदा आफूमाथि आक्रमण भएको जिकिर गरे।
“मेरो कार्यकालमा प्राधिकरणको सम्पत्ति तीन गुणा बढ्यो, नाफा पुनः विद्युत पूर्वाधारमा लगानी भयो,” घिसिङले भने, “विद्युतीकरणका लागि ठूलो लगानी गर्यौं, देशभर उज्यालो पुर्यायौं—यही राष्ट्रद्रोह हो भने जनताले फैसला गर्नेछन्।” उनका अनुसार आर्थिक वर्ष ०८०/८१ मा विद्युत प्राधिकरणको सञ्चित नाफा ४७ अर्ब रुपैयाँ पुगेको छ। उनले पछिल्लो वर्षमा विद्युत निर्यात आयातभन्दा बढी भएको र देशभित्र खपत पनि तीन गुणाले बढेको तथ्य समेत प्रस्तुत गरेका छन्।
