समाचार सुन्नुहोस :
काठमाडौँ – काठमाडौँ उपत्यका र देशका अन्य भागहरूमा पछिल्ला केही दिनदेखि वायु प्रदूषणको मात्रा अत्यधिक बढेको छ। यस्तो परिस्थितिमा बाहिरी वातावरणमा हिँडडुल गर्दा अनिवार्य रूपमा मास्क लगाउन सरकारले आग्रह गरेको छ।
वन डढेलो, कलकारखाना तथा सवारीसाधनबाट निस्कने धुँवा, फोहोर जलाउँदा उत्पन्न हुने प्रदूषण, सडक र घरबाट उठ्ने धुलो आदि कारणले वायु प्रदूषण तीव्र रूपमा बढिरहेको छ। वातावरण विभागका अनुसार प्रदूषणको सबैभन्दा उच्च जोखिम काठमाडौं उपत्यकामा देखिएको छ।
अहिले उपत्यकाको वायु प्रदूषण चार सय भन्दा माथि पुगेको वातावरण विभागको तथ्यांकले देखाएको छ। वायु गुणस्तर सूचकाङ्क (AQI) ३०१ भन्दा माथि पुग्दा स्वास्थ्यका लागि अत्यन्त खतरनाक मानिन्छ। २०१ देखि ३०० सम्मको स्तरलाई निकै अस्वस्थ, १५१ देखि २०० लाई अस्वस्थ, १०१ देखि १५० लाई संवेदनशील समूहका लागि अस्वस्थ, ५१ देखि १०० लाई मध्यम र ० देखि ५० लाई राम्रो मानिन्छ। हाल वायु प्रदूषणको कारण स्वास्थ्य समस्या बढ्दै गएकाले अस्पताल पुग्ने बिरामीको संख्या समेत उल्लेखनीय रूपमा वृद्धि भएको छ।
विभागका अनुसार काठमाडौंको रत्नपार्क, हेटौंडा, सिमरा, पोखरा, दाङ, नेपालगन्ज, सुर्खेत, महेन्द्रनगर, धनगढी, धनकुटा, दमक, विराटनगर लगायतका ठाउँमा वायु प्रदूषणको मात्रा स्वास्थ्यका लागि गम्भीर खतरा पुग्ने तहमा पुगेको छ।
