समाचार सुन्नुहोस :
काठमाडौँ – राष्ट्रिय प्रजातन्त्र पार्टी (राप्रपा) का प्रमुख सचेतक ज्ञानेन्द्र शाहीले हालै सम्पन्न राजावादी प्रदर्शनमा भारतीय नेता योगी आदित्यनाथको फोटो प्रधानमन्त्री केपी शर्मा ओलीको निर्देशनमा राखिएको दाबी गरेका छन्। सोमबार सामाजिक सञ्जालमार्फत शाहीले नेकपा एमालेका अध्यक्षसमेत रहेका प्रधानमन्त्री ओलीका सल्लाहकार विष्णु रिमालको संलग्नतामा उक्त फोटो प्रदर्शनमा राखिएको आरोप लगाए। उनका अनुसार, प्रधानमन्त्रीकै निर्देशनमा रिमालले सो कार्य गराएका हुन्।
‘फोटो कतै मिडियामा आउन पाको छैन, प्रधानमन्त्रीका सल्लाहकार विष्णु रिमालले पहिले फेसबुकमा कसरी राखे? आन्दोलन कहाँ छ भन्नेकुरा कसरी थाहा भयो?,’ शाहीले भने,’ यो सबै उनीहरूको डिजाइन हो। आफै लगाएर खिचे अनि राखे।’ साथै, उनले विदेशी एजेन्डा र सिद्धान्तमा पार्टी चलाउनेहरूले राष्ट्रिय झन्डासहितको स्वागत कार्यक्रमलाई असर पार्न त्यस्तो कुकर्म गरिएको भन्दै सोको विरोधसमेत गरेका छन्।
हिजो पूर्वराजा ज्ञानेन्द्र शाह पोखरा बसाईपछि काठमाडौं फर्किएका थिए। उनको स्वागतका लागि राप्रपाको निर्देशनमा राजावादीहरू त्रिभुवन विमानस्थलमा पुगेका थिए। सोही क्रममा भीडमा योगी आदित्यनाथको फोटो पनि देखिएको थियो।
