समाचार सुन्नुहोस :
काठमाडौँ – काठमाडौँ महानगरपालिकाले राष्ट्रिय प्रजातन्त्र पार्टी (राप्रपा) लाई सार्वजनिक स्थानहरूमा फोहर फ्याँक्दै वातावरणीय क्षति पुर्याएको आरोपमा एक लाख रुपैयाँ जरिवाना गराएको छ। महानगर प्रहरीको पत्रअनुसार, २०८१ फागुन २५ गते धुम्बाराहीस्थित पार्टी कार्यालयबाट निकालिएको राप्रपाको कार्यक्रममा सहभागीहरूले त्रिभुवन अन्तर्राष्ट्रिय विमानस्थल, तिलगंगा, गौशाला लगायतका स्थानहरूमा सडक, पेटी, आईल्याण्ड तथा रेलिङहरूमा क्षति पुर्याएका थिए।
महानगरपालिकाले यस कार्यलाई फोहर मैला व्यवस्थापन ऐन, २०६८, काठमाडौँ महानगरपालिका वातावरण तथा प्राकृतिक स्रोत संरक्षण ऐन, २०७७, तथा आर्थिक ऐन, २०५१ को उल्लङ्घन मानेर जरिवाना तिर्न निर्देशन दिएको छ।
महानगर प्रहरी निरीक्षक लिलाराज गाछाले हस्ताक्षर गरेको यो पत्र निर्वाचन आयोग नेपाल र काठमाडौँ महानगरपालिकाको प्रशासन विभागलाई समेत जानकारीका लागि पठाइएको छ। पूर्व राजा ज्ञानेन्द्र शाहको स्वागतका क्रममा राप्रपा लगायतका केही समूहले काठमाडौंमा प्रदर्शन गरेका थिए।
