काठमाडौं – चार्टर विमानमार्फत अमेरिका पुगेका आठ नेपालीलाई स्वदेश फर्काइएको छ । त्रिभुवन अन्तर्राष्ट्रिय विमानस्थलमा ओर्लिएलगत्तै मानव बेचबिखन अनुसन्धान ब्युरोले उनीहरुलाई नियन्त्रणमा लिएको छ ।
प्रारम्भिक सोधपुछका क्रममा उनीहरुले अमेरिका पुग्न १२ विभिन्न देशका सीमा अवैध रूपमा पार गरेको खुलासा गरेका छन् । ब्युरोका अनुसन्धान अधिकृतका अनुसार ती नेपालीहरुले अमेरिका पुग्न ५० लाखदेखि १ करोड रुपैयाँसम्म खर्च गरेको बताएका छन् । प्रहरी स्रोतका अनुसार फर्काइएकामध्ये रुकुम पूर्वका दुई, रोल्पाका एक, दाङका तीन र डोटीका एक जना रहेका छन् ।
मानव बेचबिखन अनुसन्धान ब्युरोका प्रवक्ता एसपी नरेन्द्र कुँवरका अनुसार ती नेपाली बढीमा १० महिना र थोरैमा ५ महिना अमेरिका बसेका थिए । अमेरिका प्रशासनले उनीहरुलाई अध्यागमन हिरासतबाट न्यू ह्याम्पशायर राज्यको पोर्टसमाउथ अन्तर्राष्ट्रिय विमानस्थलसम्म पुर्याएको थियो । त्यसपछि उनीहरुलाई अल्बानियाको तिराना अन्तर्राष्ट्रिय विमानस्थल हुँदै नेपाल ल्याइएको थियो ।
अल्बानियामा रहँदा उनीहरुलाई हत्कडी लगाइएको बताइएको छ । ब्युरोले गरेको सोधपुछमा ती नेपालीहरुले आफूखुशी अमेरिका पुगेको स्वीकारेका छन् । सोधपुछपछि कसैले उजुरी दर्ता नगरेको ब्युरोले जनाएको छ ।
