मेलम्चीको पाइप फुट्दा थापाथली क्षेत्र जलमग्न

समाचार सुन्नुहोस : 

काठमाडौँ – काठमाडौँको थापाथली चोक नजिक मेलम्चीको पाइप फुटेपछि जलमग्न भएको छ। आज बिहान पाइप फुट्दा उक्त क्षेत्रमा जलमग्न हुनुका साथै सडकसमेत अवरुद्ध भएको छ।

काठमाडौँ उपत्यका खानेपानी लिमिटेड (केयुकेएल)का प्रमुख कार्यकारी निर्देशक अशोककुमार पौडेलका अनुसार पाइप फुट्नुको कारण पत्ता लगाई पाइप मर्मत गरेर पानी सञ्चालन गर्ने तयारी भइरहेको छ। उनले क्षति मूल्यांकनपछि पानी आपूर्ति पुनः सुरु गरिने जानकारी दिए।

पाइप फुटेपछि नर्भिक इन्टरनेसनल अस्पताल जाने सडक जलमग्न भएको छ भने वरपरका घर तथा पसलहरूमा पनि पानी पसेको छ। यसअघि पनि बबरमहल क्षेत्रमा नेपाल विद्युत् प्राधिकरणको काम गर्दा खानेपानीको मुख्य पाइप लाइन फुट्दा त्यहाँको सरकारी कार्यालयसमेत डुबानमा परेको थियो।