अझै शुक्रबारसम्म आँधीको प्रकोप रहने
ओसाका– जापानको दक्षिणपश्चिममा अवस्थित क्युसु द्वीपमा भारी वर्षाको क्रम नरोकिए पछि त्यहाँका करिब तीन हजार व्यक्तिलाई त्यस क्षेत्रबाट सरकारले सुरक्षित स्थानमा सारेको स्थानीय सञ्चारमाध्यमहरुले जनाएका छन् ।गत हप्तादेखिनै सुरु भएको यस भारी वर्षा पछिको बाढी र पहिरोको प्रकोपबाट बचाउन त्यस क्षेत्रबाट बिहीबार बिहानदेखिनै नागरिकलाई सार्ने काम सुरु भएको समाचारमा जनाइएको छ ।
बाढी र वर्षाका कारण हालसम्म सोही द्वीपमा कम्तीमा पनि ३० जनाको ज्यान गइसकेको जानकारी जापानी अधिकारीहरुले दिएका छन् । साथै सो बाढीका कारण त्यहाँका एकलाख भन्दा बढी नागरिक प्रभावित भएका पनि समाचारमा जनाइएको छ ।
सञ्चारमाध्यमले सो स्थानमा आँधीको पनि डर रहेको जनाएका थिए । यस प्रकोपबाट ६० स्थानमा पहिरोले सताएपछि अझै केही व्यक्ति बेपत्ता भएको पनि समाचारमा उल्लेख छ ।
सो द्वीप नजिकैको कुमामोतो प्रान्तको आसो सहरमा ५०० मिलिमिटरसम्म वर्षा भएपछि सो प्रकोप आएको समाचारमा उल्लेख छ । जापानको जलवायु निकायले अझै शुक्रबारसम्म आँधीको प्रकोप रहेको चेतावनी दिएको छ । ***
