क्युसुबाट दुईलाख छयालिस हजारलाई विस्थापित हुन आदेश

ओसाका (जापान)– जापानको क्युसु द्वीपमा शनिबारदेखि परेको अबिरल वर्षा पश्चात् सुरु भएको बाढी र पहिरोको कारण सरकारले त्यस क्षेत्रबाट दुईलाख ४६ हजार व्यक्तिलाई विस्थापित हुनको लागि आदेश दिएको छ ।

गत बुधबारदेखि सुरु भएको भारी वर्षा पश्चात्को बाढी र पहिरोमा यस क्षेत्रमा २२ व्यक्तिले ज्यान गुमाएको पनि समाचारमा प्रष्ट पारिएको छ । कुमामोतो प्रान्तमा यस भारी वर्षाका कारण आठ व्यक्ति अझै बेपत्ता भएको समाचारमा जनाइएको छ  ।

कुमामोतो प्रान्तका सहरहरुमा गत चार दिनभित्र ८०० मिलिलिटर पानी परेको मौसम सम्बन्धी अधिकारीहरूले जनाएका छन् ।

यस प्रकोपले प्रभावित केही क्षेत्रहरूमा प्रत्येक घण्टामा ८० मिलिमिटरभन्दा बढी पानी परेको हुनाले त्यहाँ बाढी र पहिरोको प्रकोप हुनसक्ने चेतावनी जापानीज मौसम अधिकारीहरूले गरेका छन् ।