सरकार फेरि बने पनि बाबुरामकै नेतृत्वमाः मन्त्री रायमाझी

अर्घाखाँची – स्थानीय विकास मन्त्री टोपबहादुर रायमाझीले अब बन्ने राष्ट्रिय सरकार पनि बाबुराम भटराईको नेतृत्वमा गठन हुने दाबी गरेका छन् ।

भरसक यही सरकारलाई राष्ट्रिय स्वरुप दिने नभए नयाँ बन्ने सरकार पनि बाबुरामको नेतृत्वको विकल्प नभएको उनको भनाइ थियो । गोखुगा गाविसको रागामारे-पाल्ते-रानाहल्दे मोटरबाटे उद्‌घाटन गर्दै रायमाझीले सरकारले शान्ति र संविधानका कामलाई अगाडी बढाएको र जेठ १४ भित्र शान्ति प्रक्रिया र संविधानका खाका बाहिर ल्याउने तयारीमा रहेको बताए ।

‘शान्ति र संविधानका काम पुरा गर्न अहिले निकै अप्ठ्यारो परेको छ,’ उनले भने, ‘यस्तै भद्रगोलमा गोल हान्ने हो गोल हान्दा विजय हुन्छ ।’ उनले अरु कुरामा भाजो हाल्न खोजे पनि सबै दलमा शान्ति र संविधानको विकल्प नभएकाले यसमा सबै एकढिक्का भएर लाग्नुपर्ने बताए ।