काठमाडौं- १६ दिनका लागि भारतको जोधपुरमा पारिवारिक वैवाहिक समारोहमा गएका पूर्वराजा ज्ञानेन्द्र शाह करिब एक महिनासम्म पनि फर्किएका छैनन् ।दुई साताअघि नै स्वदेश फर्कने भनिए पनि व्यक्तिगत कामका कारण बसाई लम्बिएको शाह निकटवर्तीहरूले दाबी गरेका छन् ।
‘व्यक्तिगत कामले हामी दिल्लीमै बसिरहेका छौं । सम्भवतः आगामी आइतबार नेपाल फर्कन्छौं,’ शाहसँगै रहेका उनका सहयोगी सागर तिमिल्सिनाले भने ।
आफ्ना नातेदारको विवाहमा सहभागी हुन भन्दै शाह गत पुस २९ गते पूर्वरानी कोमल, पूर्वयुवराज्ञी हिमानी तथा नाति हृदयेन्द्रसँगै नयाँदिल्ली आएका थिए ।
यहाँ उनले राजनीतिक भेटघाट गर्ने प्रयास गरेको स्रोतहरूले बताए पनि स्वतन्त्र पुष्टि भने हुन सकेको छैन । भारतीय कंग्रेस पार्टीका विदेश विभाग प्रमुखसमेत रहेका शाह नातेदार करण सिंहमार्फत त्यस्तो भेटघाटको प्रयास भएको दाबी स्रोतहरूले गरेका छन् ।
