टोकियो – जापानको नागोया शहरमा एक ५० वर्षीया महिलाले ५९ वर्षीय पुरुषको ढाडमा छुरा प्रहार गरी हत्या गरेकी छज् । मंगलबार राति करिब १० बजे नागोयाको हिगाशी वार्डस्थित कम्पनीका कार्यकारी नोबुहिको शिमुराको अपार्टमेन्ट भवन अगाडिको सडकमा पछाडिबाट पटक-पटक छुरा प्रहार गरिएको हो ।
प्रहरीले उनीहरू चिनजानको भएको बताएको छ । एक बटुवाले प्रहरीलाई घटनाबारे जानकारी दिएका थिए । शिमुरालाई तत्काल अस्पताल लगिएकोमा बुधबार बिहान सबेरै उनको मृत्यु भयो । आइची प्रिफेक्चरको कासुगाई शहरकी इटो घटनास्थलबाट कारमा भागेकी थिइन् ।
तर, बुधबार बिहान ३ः५० बजे आइची प्रिफेक्चरकै टोगो शहरबाट प्रहरीले उनलाई पक्राउ गर्यो । घटनास्थलको सडकमा रहेको सीसीटीभी क्यामेराको फुटेज विश्लेषणपछि उनको कार पहिचान भएको थियो । इटोले शिमुरालाई छुरा प्रहार गरेको स्वीकार गरेकी छिन् तर हत्या गर्ने मनसाय भने नरहेको बयान दिएकी छन् ।
शिमुरा आइची प्रिफेक्चरको कासुगाई शहरमा मुख्यालय रहेको सुरक्षा अलार्म उत्पादन तथा बिक्री गर्ने कम्पनीका अध्यक्ष थिए । अनुसन्धानकर्ताहरूका अनुसार, घटना हुनुभन्दा ठीक अघि इटो शिमुरालाई उनको अपार्टमेन्टमा भेट्न गएकी थिइन् र उनीहरू अपार्टमेन्टबाट बाहिर निस्किएपछि इटोले शिमुरामाथि छुरा प्रहार गरेको आरोप लगाइएको छ ।
