काठमाडौं – रौतहटमा भएको चर्चित बम विस्फोट तथा हत्याकाण्डका मुख्य अभियुक्त नेपाली कांग्रेसका नेता मोहम्मद आफताब आलमलाई उच्च अदालत जनकपुर, अस्थायी इजलास वीरगन्जले सफाइ दिएको छ । बुधबार न्यायाधीशद्वय खुसीप्रसाद थारु र अर्जुन महर्जनको इजलासले रौतहट जिल्ला अदालतको जन्मकैदको फैसलालाई उल्ट्याउँदै आलमलाई रिहा गर्न आदेश दिएको हो ।
यसअघि रौतहट जिल्ला अदालतले २०८१ वैशाखमा आलमसहित चार जनालाई राजपुर बम विस्फोट र त्यसपछिको सामूहिक हत्यामा दोषी ठहर गर्दै जन्मकैदको फैसला सुनाएको थियो । जन्मकैद पाउने अन्यमा उनका भाइ मोहम्मद महताब आलम, शेख सराज र बद्री सहनी थिए ।
पहिलो संविधानसभा निर्वाचनको पूर्वसन्ध्यामा २०६४ चैत २७ गते राति तत्कालीन राजपुर फरदवा गाविस (हाल राजपुर नगरपालिका) मा भएको बम विस्फोट र घटनाका प्रमाण मेटाउन २३ जनालाई इँटाभट्टामा जिउँदै जलाएर मारेको अभियोगमा आलमसहित ११ जनाविरुद्ध २०۷६ साल कात्तिक १८ गते मुद्दा दायर भएको थियो। सोही मुद्दामा कांग्रेस नेता आलम २०७६ असोज २६ गते पक्राउ परेका थिए ।
जिल्ला अदालत रौतहटको आदेशविरुद्ध उनी उच्च अदालत जनकपुरको वीरगन्ज इजलासमा पुगेका थिए । उक्त इजलासले यसअघि जिल्ला अदालतले पुर्पक्षका लागि थुनामा राख्न दिएको आदेशलाई सदर गरेको थियो ।
उच्च अदालतले आलमलाई सफाइ दिनुका मुख्य आधारहरू निम्न रहेका छन्:-
- संकलित सबुद प्रमाणबाट मोहम्मद आफताब आलमको घरमा २०६४ चैत २७ गते बम विस्फोटको वारदात भएको वस्तुनिष्ठ प्रमाणले पुष्टि हुन नसकेको ।
- घाइते भनिएका पिन्टु भनिने त्रिलोकप्रसाद सिंह र ओसी अख्तरलाई ट्याक्टरमा हाली राजा इँटाभट्टामा लगी पोलेको भन्ने ठोस सबुद प्रमाण भेटिन नसकेको ।
- विधि विज्ञान प्रयोगशालाबाट पनि मृतकहरूलाई इँटाभट्टामा पोलेको अभियोग पुष्टि हुन नसकेको ।