समाचार सुन्नुहोस :
काठमाडौँ – अमेरिकी सरकारले विदेशमा रहेका आफ्ना कूटनीतिक नियोगहरूलाई नयाँ विद्यार्थी भिसा आवेदनहरू तत्कालका लागि रोक्न आदेश दिएको छ। राष्ट्रपति डोनाल्ड ट्रम्पको नेतृत्वमा रहेको प्रशासनले विद्यार्थी भिसा चाहनेहरूका सामाजिक सञ्जालहरू गहन रूपमा परीक्षण गरिने नीति अघि बढाएको छ।
अमेरिकी विदेश मन्त्रालयले विश्वभरका दूतावास तथा वाणिज्यदूतावासहरूलाई पठाएको निर्देशनमा विदेश मन्त्री मार्को रुबियोले अर्को सूचनासम्म नयाँ आवेदनहरू स्थगनमा राख्न भनिएको छ। निर्देशनमा भनिएको छ, ‘ ‘विद्यार्थी तथा बिदेशी विनिमय कार्यक्रमका लागि आवेदन दिनेहरूका सामाजिक सञ्जालको जाँच प्रक्रिया अझ कडाइका साथ अगाडि बढाइनेछ,’जसले विश्वभरका अमेरिकी दूतावास र वाणिज्यदूतावासहरूमा ‘गम्भीर प्रभाव’ पार्नेछ।
यो निर्णय राष्ट्रपति ट्रम्प र अमेरिकी विश्वविद्यालयहरूबीच चर्किंदो विवादको सन्दर्भमा आएको हो। ट्रम्पले देशका केहि प्रमुख शैक्षिक संस्थाहरूमाथि वामपन्थी विचारधाराको प्रचार गरेको आरोप लगाउँदै आएका छन्। साथै, उनले विश्वविद्यालयहरूमा यहूदी विरोधी गतिविधिहरूलाई स्थान दिइएको र जातीय आधारमा भर्ना प्रक्रिया भेदभावपूर्ण रहेको आरोपसमेत लगाएका छन्। विशेषगरी हार्वर्ड विश्वविद्यालयसँग ट्रम्प प्रशासनको विवाद पछिल्ला महिनाहरूमा झनै चर्किएको छ।
