समाचार सुन्नुहोस :
काठमाडौँ – बागमती प्रदेश सरकारले आर्थिक वर्ष २०८२/८३ का लागि तयार पारेको नीति तथा कार्यक्रम आज सार्वजनिक गर्ने भएको छ। यसका लागि प्रदेशसभा बैठक जेठ १४ गते दिउँसो १ बजेका लागि बोलाइएको छ। प्रदेश प्रमुख दीपक प्रसाद देवकोटाले बैठकमा नीति कार्यक्रम वाचन गर्नेछन्। सभामुख भुवनकुमार पाठकले सबै सांसदलाई औपचारिक पोसाकमा निर्धारित समयभन्दा १० मिनेटअघि उपस्थित हुन निर्देशन दिएका छन्।
सरकारले नीति कार्यक्रम तयार पार्न विषयगत मन्त्रालयहरूबाट सुझाव संकलन गरी मंगलबार बसेको मन्त्रीपरिषद् बैठकमा स्वीकृत गरिसकेको छ। बागमती प्रदेशका मुख्यमन्त्री बहादुर सिंह लामाका अनुसार आगामी नीति कार्यक्रम कृषि, पर्यटन, शिक्षा र रोजगारीलाई उच्च प्राथमिकतामा राखेर तयार पारिएको छ। मुख्यमन्त्री लामाले यस वर्षको नीति कार्यक्रम नारामुखी नभई प्रभावकारी र उपलब्धिमूलक हुने बताए। उनले लगानीको स्पष्ट मोडल तय गरेर लगानी बोर्ड गठन गर्ने तयारी भइरहेको जानकारी पनि दिए।
यसअघि आर्थिक मामिला तथा योजनामन्त्री कुन्दनराज काफ्लेले आगामी वर्षको विनियोजन विधेयकको सिद्धान्त र प्राथमिकता संसद्मा पेश गरेका थिए। जसमा दुई दिन संसद्ले छलफल गरेको थियो।
