टोकियो – जापानको यामानाशी प्रान्तस्थित मिनामी आल्प्स शहरमा एक १६ वर्षीय किशोरले आफ्नै ६९ वर्षीय बुबाको छुरा प्रहार गरी हत्या गरेको अभियोगमा प्रहरीले उनलाई पक्राउ गरेको छ ।
स्थानीय प्रहरीका अनुसार, शनिबार बिहान करिब ९:४० बजे ती किशोर आफैं प्रहरी चौकीमा उपस्थित भई आफूले बुबाको हत्या गरेको स्वीकार गरेका थिए । प्रहरीले तत्काल किशोरको घरमा पुगेर अनुसन्धान गर्दा उनका बुबा ओछ्यानमा छुरा प्रहारबाट रक्ताम्मे भई अचेत अवस्थामा लडिरहेका भेटिएका थिए । उनलाई तुरुन्तै अस्पताल पुर्याइए पनि शनिबार साँझ करिब ६:३० बजे उनको मृत्यु भएको थियो ।
हाई स्कूलमा अध्ययनरत ती किशोर आफ्ना बाबुआमासँग बस्दै आएका थिए । घटना हुँदा उनकी आमा काममा गएको बताइएको छ । प्रहरीले मृतकको शयनकक्षबाट रगत लतपतिएको चक्कु बरामद गरेको छ ।
किशोरका एक घनिष्ठ मित्रले प्रहरीलाई दिएको बयानअनुसार, उनले सन् २०२३ को शरद ऋतुदेखि नै आफ्ना बुबाको अन्य महिलाहरूसँगको सम्बन्धबारे बारम्बार कुराकानी गर्ने गरेका थिए । आमाबाहेक अन्य महिलाहरू घरमा निरन्तर आउजाउ गरिरहने विषयले उनी निकै चिन्तित रहेको मित्रले बताएका छन् । घटनाको थप अनुसन्धान भइरहेको प्रहरीले जनाएको छ ।
