काठमाडौं – युक्रेनमा भएको पछिल्लो रूसी हवाई आक्रमणमा कम्तीमा १३ जनाको मृत्यु भएको छ भने ५६ जना घाइते भएका छन् । युक्रेनी अधिकारीहरूका अनुसार रुसले राजधानी किभसहित देशका विभिन्न स्थानमा भारी संख्यामा ड्रोन र क्षेप्यास्त्र आक्रमण गरेको हो ।
युक्रेनी वायु सेनाले जानकारी दिएको अनुसार रुसले किभमा मात्रै २५० ड्रोन र १४ वटा ब्यालिस्टिक क्षेप्यास्त्र प्रहार गरेको छ । ती आक्रमणका कारण राजधानीलगायतका धेरै क्षेत्रमा आवासीय भवनहरूमा भीषण आगलागी भएको बताइएको छ। राजधानी किभमा मात्र १४ जना घाइते भएका छन् ।
यस भीषण आक्रमणलाई लिएर युक्रेनका राष्ट्रपति भोलोदिमिर जेलेन्स्कीले सामाजिक सञ्जाल ‘एक्स’ (पूर्व ट्विटर) मा प्रतिक्रिया दिँदै मस्को (रुस) नै युद्ध लम्ब्याउने पक्षमा रहेको टिप्पणी गरेका छन् । उनले लेखेका छन्, ‘यस्ता हरेक आक्रमणबाट विश्व अझ स्पष्ट हुँदै गइरहेको छ- युद्धको लम्बाइ मस्कोको निर्णयबाट निर्देशित छ ।’
आक्रमणले सामान्य नागरिकहरूको जनजीवन प्रभावित बनाएको छ भने युक्रेनमा मानवीय संकट झनै गहिरिएको छ । रूसी आक्रमणको निन्दा गर्दै अन्तर्राष्ट्रिय समुदायबाट प्रतिक्रिया आउन सुरु भइसकेको छ । यसअघि पनि रुसले युक्रेनका ऊर्जास्रोत, आवासीय क्षेत्र र आधारभूत पूर्वाधारलाई लक्षित गर्दै बारम्बार आक्रमण गर्दै आएको छ । पछिल्लो आक्रमणलाई युद्धको एक भयावह रूपका रूपमा हेरिएको छ ।
