समाचार सुन्नुहोस :
काठमाडौँ – नेपाली कांग्रेसका नेता डा. शेखर कोइरालाले गृहमन्त्री रमेश लेखकलाई नैतिकताको आधारमा राजीनामा दिन आग्रह गरेका छन् । शनिबार विराटनगर विमानस्थलमा सञ्चारकर्मीहरूसँग कुराकानी गर्दै डा. कोइरालाले अध्यागमन विभागमा उठेको भ्रष्टाचारसम्बन्धी विषयले गम्भीरता लिएको बताउँदै, निष्पक्ष छानबिनका लागि मन्त्री लेखकले बाटो खुला गर्नु आवश्यक रहेको बताएका हुन्।
कोइरालाले विगतमा पनि केही मन्त्रीहरूले छानबिनलाई सहज बनाउन स्वेच्छिक राजीनामा दिएका उदाहरण दिदै गृहमन्त्री लेखकले पनि राजीनामा दिनु उपयुक्त हुने बताए। संवैधानिक निकायहरू सचिवस्तरीय सेवानिवृत्त अधिकारीहरूको “रिटायरमेन्ट क्लब” जस्तो बनेको भन्दै कोइरालाले कुलिङ पिरियड (विश्राम अवधि) आवश्यक भएको धारणा राखे।
लोकतान्त्रिक मूल्यमा आधारित दलहरूले जनताको मतप्रतिको सम्मान गर्नुपर्ने उल्लेख गर्दै उनले हिन्दु राष्ट्र र संवैधानिक राजसंस्थाका विषयमा जनमतसंग्रह गराउन सकिने पनि बताएका छन्। अन्त्यमा, कोइरालाले नेपाली कांग्रेसको १५औं महाधिवेशन २०८२ साल मंसिरमै गर्नुपर्ने अडान पुनः दोहोर्याए। उनले पार्टीका कार्यकर्ताहरूलाई महाधिवेशनको सुनिश्चितताका लागि दबाब दिन आह्वान समेत गरे।
