हानेदा विमानस्थल नजिकै कारखानामा आगलागी (तस्बिरहरु)

टोकियो – जापानको सबैभन्दा व्यस्त यात्रु विमानस्थल हानेदाको नजिकै शुक्रबार दिउँसो कारखानामा आगलागी हुँदा केही उडानहरू ढिलो भएका छन् । जापानको यातायात मन्त्रालय र टोकियो दमकल विभागका अनुसार, आगलागी दिउँसो ५ बजे तिर भएको हो ।

राजधानी टोकियोको हानेदा विमानस्थलदेखि करिब २ किलोमिटर उत्तर रहेको औद्योगिक क्षेत्रभित्र रहेको चारतले भवनको दोस्रो तलामा आगो फैलिएको बताइएको छ । हालसम्म आगलागीबाट कुनै मानवीय क्षति नभएको टोकियो दमकल विभागले जनाएको छ ।दमकल विभागका अनुसार, आपतकालीन कलमार्फत आएको सूचनामा कारखानाको कन्वेयर बेल्टमा आगो लागेको प्रारम्भिक विवरण प्राप्त भएको छ । आगो निभाउने प्रयास जारी रहेका बेला नजिकको विमानस्थलमा केही उडानहरू प्रभावित भएका छन् । आगलागीको कारण र क्षतिको विस्तृत विवरण आउन बाँकी छ ।