टोकियो – जापानमा अप्रिल महिनामा विदेशी पर्यटकको संख्याले नयाँ मासिक कीर्तिमान कायम गरेको छ । सरकारी तथ्याङ्कअनुसार कमजोर येन, मनमोहक चेरी ब्लसम (साकुरा) सिजन र विदेशमा इस्टरको बिदाका कारण पर्यटक आगमनमा उल्लेख्य वृद्धि भई ३९ लाख १० हजार विदेशी पर्यटक जापान भित्रिएका छन् ।
जापान राष्ट्रिय पर्यटन संगठन (जेएनटीओ) ले बुधबार सार्वजनिक गरेको आँकडाअनुसार, गत वर्षको सोही अवधिको तुलनामा विदेशी आगमन २८.५ प्रतिशतले बढेको हो । यसले यसै वर्षको जनवरीमा स्थापित ३७ लाख ८० हजार पर्यटकको अघिल्लो कीर्तिमानलाई समेत उछिनेको छ ।
सन् २०२४ को जनवरीदेखि अप्रिलसम्मको चार महिनामा जापानले करिब १ करोड ४४ लाख ५० हजार विदेशी पर्यटकलाई स्वागत गरिसकेको छ, जुन गत वर्षको सोही अवधिमा रेकर्ड गरिएको १ करोड १६ लाखभन्दा निकै बढी हो ।
गत वर्ष जापानमा ३ करोड ६० लाखभन्दा बढी विदेशी पर्यटक भित्रिएका थिए । यसका कारण लोकप्रिय पर्यटकीय क्षेत्रहरूमा अत्यधिक भीडभाडको समस्या देखिएपछि अधिकारीहरू पर्यटकलाई ग्रामीण इलाकातर्फ आकर्षित गर्ने तथा व्यवस्थापनका उपायहरू खोज्न संघर्षरत छन् ।
जापान पर्यटन एजेन्सीका कमिश्नर नाओया हाराकावाले एक पत्रकार सम्मेलनमा बोल्दै यस वर्ष विदेशी पर्यटकको संख्या ४ करोड ५० लाखदेखि ४ करोड ६० लाखसम्म पुग्न सक्ने अनुमान प्रस्तुत गरे । ‘हामी अब यस (व्यवस्थापन) का लागि सक्रिय कदम चाल्न सुरु गर्दैछौं,’ उनले भने ।
देश तथा क्षेत्रगत रूपमा हेर्दा, अप्रिलमा सबैभन्दा बढी चीनबाट ७ लाख ६५ हजार १०० पर्यटक जापान आएका छन्, जुन गत वर्षको सोही महिनाको तुलनामा ४३.४ प्रतिशतले बढी हो । त्यसैगरी, दक्षिण कोरियाबाट आउने पर्यटकको संख्या ९.१ प्रतिशतले वृद्धि भई ७ लाख २१ हजार ६०० पुगेको छ भने ताइवानबाट ५ लाख ३७ हजार ६०० पर्यटक भित्रिएका छन्, जुन गत वर्षको तुलनामा १६.९ प्रतिशतले अधिक हो ।
क्यानडा र बेलायतबाट आउने पर्यटकको संख्याले पनि मासिक कीर्तिमान कायम गरेको छ । अप्रिलमा क्यानडाबाट ७२ हजार ६०० र बेलायतबाट ६९ हजार ५०० पर्यटक जापान भित्रिए। यसका साथै, दक्षिण कोरिया, चीन र सिंगापुरबाट अप्रिल महिनामा अहिलेसम्मकै सबैभन्दा बढी पर्यटक आएको तथ्याङ्कले देखाउँछ ।
यसैबीच, पर्यटन एजेन्सीले जापानी आन्तरिक पर्यटकहरूले जनवरी-मार्च त्रैमासिकमा ५.६५ ट्रिलियन येन (लगभग ३९.१ अर्ब अमेरिकी डलर) खर्च गरेको जनाएको छ । यो गत वर्षको सोही अवधिको तुलनामा १५.५ प्रतिशतले बढी हो । यसमध्ये आवाससहितको यात्रामा ४.५९ ट्रिलियन येन र एकदिने भ्रमणहरूमा १.०६ ट्रिलियन येन खर्च भएको थियो ।
