दिउँसै रात पार्ने ऊर्जामन्त्रीलाई हटाउन महाबीर पुनको माग

समाचार सुन्नुहोस : 

काठमाडौँ – सामाजिक अभियन्ता महावीर पुनले ऊर्जा, जलस्रोत तथा सिँचाइ मन्त्री दीपक खड्काको राजीनामाको माग गरेका छन्। बुधबार सामाजिक सञ्जालमार्फत आक्रोश प्रकट गर्दै उनले मन्त्री खड्कालाई पदबाट हटाउनुपर्ने स्पष्ट रूपमा बताएका हुन्।

पुनले प्रधानमन्त्री केपी शर्मा ओली र नेपाली कांग्रेस दुवैले मन्त्री खड्कालाई हटाउने कुनै संकेत नदेखाएकोप्रति असन्तोष समेत व्यक्त गरेका छन्। उनले सामाजिक सञ्जाल फेसबुकमा लेखेका छन्, ‘ऊर्जामन्त्री जस्तो दिउँसै रात पार्नेलाई संयुक्त बृहत् जनआन्दोलन गरेर नहटाउने हो भने देश डुब्नेछ । त्यस्तो दृष्ट व्यक्तिलाई हटाउने कांग्रेस पार्टीले अथवा प्रधानमन्त्रीले हो। तर उनीहरूले हटाउने छाँटकाँट देखिएन। बृहत् जनआन्दोलन अन्तिम उपाय देखियो।’