काठमाडौं – अमेरिकी राष्ट्रपति डोनाल्ड ट्रम्पले रुस-युक्रेन युद्ध अन्त्यका लागि तत्काल वार्ता हुने संकेत दिएका छन् । रुसी राष्ट्रपति भ्लाडिमिर पुटिनसँगको दुई घण्टा लामो टेलिफोन संवादपछि ट्रम्पले यो घोषणा गरेका हुन् ।
पुटिनसँगको कुराकानी ‘सौहार्दपूर्ण र सकारात्मक’ भएको उल्लेख गर्दै ट्रम्पले दुवै पक्षको प्रत्यक्ष वार्ता नै स्थायी शान्तिको आधार बन्ने स्पष्ट पारे । ‘यो युद्ध अब धेरै दिन चल्न सक्दैन,’ ट्रम्पले सामाजिक सञ्जालमार्फत भने, ‘शान्तिका लागि अमेरिका र केही युरोपेली देशहरू निर्णायक भूमिकामा रहनेछन् ।’
रुसी राष्ट्रपति पुटिनले पनि शान्ति स्थापना गर्न युक्रेनसँग वार्ताका लागि आफू तयार रहेको बताएका छन् । यद्यपि, युरोपेली मुलुक र अमेरिकाले प्रस्ताव गरेको ३० दिने युद्धविरामबारे भने पुटिनले कुनै स्पष्ट धारणा दिएका छैनन् ।
ट्रम्पले पुटिनसँग वार्ता गर्नु अघि युक्रेनी राष्ट्रपति भोलोदिमिर जेलेन्स्कीलाई पनि फोन गरेका थिए । वार्ताका क्रममा ट्रम्पले युक्रेनसम्बन्धी कुनै पनि निर्णय सल्लाहमै गरिनुपर्ने कुरामा जोड दिएका थिए ।
जेलेन्स्कीले स्थायी शान्तिको पक्षमा आफू सदैव तयार रहेको दोहोर्याउँदै रुसले यसलाई अटेर गरे कडा प्रतिबन्ध लागु गरिनुपर्ने चेतावनीसमेत दिएका छन् । ‘वार्ताका प्रस्तावहरू आएपछि मात्र निर्णय गर्न सकिन्छ,’ जेलेन्स्कीको भनाइ छ।
युद्धको सुरुयता यता अमेरिकी नेतृत्वमा पश्चिमी मुलुकहरू युक्रेनको पक्षमा रहँदै आएका छन् । तर हालको घटनाक्रमले आगामी दिनमा युद्ध अन्त्यका सम्भावना बढेका संकेत देखिएको विश्लेषकहरूको भनाइ छ ।
