काठमाडौँ – यस वर्षको प्रतिक्षित हलिउड फिल्म ‘सुपरम्यान’को ट्रेलर सार्वजनिक भएसँगै डीसी फ्यानहरूबीच नयाँ चर्चा सुरु भएको छ। निर्देशक जेम्स गनले निर्देशन गरेको यो चलचित्रको ट्रेलरमा सुपरम्यान जनताको सेवामा समर्पित पात्रबाट एकाएक विवादित र संकामा परेका व्यक्तिमा रूपान्तरण भएको देखिन्छ।
साढे तीन मिनेटको यो ट्रेलर डीसीको आधिकारिक युट्युब च्यानलमा सार्वजनिक गरिएको हो, जसले सार्वजनिक भएपछि छोटो समयमै भाइरल बनिरहेको छ। ट्रेलरको सुरु एक अन्तर्वार्ताबाट हुन्छ, जहाँ सुपरम्यानलाई तीव्र र विवादास्पद प्रश्नहरू सोधिन्छ— “तपाईंविरुद्ध हालसालै धेरै आरोप लागेका छन्, के तपाईंमाथि अनुसन्धान चलिरहेको छ?”
सुपरम्यान अब मात्र नायक होइन, राजनीति र जनमतको द्वन्द्वमा परेको व्यक्ति बनेका छन्। जनताको भलाइ गर्दा गर्दै उनै जनताको नजरमा अपराधी देखिन थालेका छन्। डेभिड कोरेनस्वेटले सुपरम्यानको भूमिका निभाएका छन् भने राहेल ब्रोस्नाहन पनि प्रमुख भूमिकामा देखिँदैछन्। साथै, ट्रेलरमा सुपरम्यानको कुकुर ‘क्रिप्टो’ ले पनि दर्शकको ध्यान तानेको छ।
