समाचार सुन्नुहोस :
काठमाडौँ – प्रधानमन्त्री केपी शर्मा ओलीले विश्वकै सर्वोच्च शिखर सगरमाथाको नाममा सुरु गरिएको ‘सगरमाथा संवाद’ केवल सम्मेलन नभई पृथ्वी, महासागर र मानव सभ्यताको संरक्षणप्रति समर्पित विश्वव्यापी पहल भएको स्पष्ट पारेका छन्।
नेपाल सरकारले पहिलोपटक आयोजना गरेको यो संवादका उद्घाटन सत्रमा बोल्दै प्रधानमन्त्री ओलीले हिमालको संरक्षणलाई पृथ्वी र मानव जातिको अस्तित्वसँग जोडिएको वास्तविकता स्वीकार गर्दै, यसै आधारमा इमानदार संवाद, ज्ञानको आदानप्रदान र साझा पहलको आवश्यकता रहेको बताए। उनले यही सोचबाट प्रेरित भई सगरमाथाको नाममा यस्तो अन्तर्राष्ट्रिय संवाद सुरु गरिएको बताए।
‘आशा गर्छौं, यो संवाद—त्यत्तिकै उच्च बनोस् । उच्च नैतिक स्पष्टता, दृढ बौद्धिक साहस र सुन्दर भविष्य निर्माणका लागि अटल साझा दृष्टिकोणमा उच्च बनोस्,’ प्रधानमन्त्री ओलीले भने, ‘जलवायु परिवर्तनको कारक मानिएका हरितगृह ग्यास उत्सर्जनमा हाम्रो भूमिका न्यून छ तर वातावरण संरक्षणमा हाम्रो योगदान महत्वपूर्ण छ । तथापि हामीले असर भने धेरै भोगिरहेका छौँ । हाम्रा घरबासहरू पहिराले बगाइरहेका छन् । बाढी र खडेरी अकस्मात आउँछ, समस्या गर्छ । यसविरुद्ध हामी डटिरहेका छौँ ।’
