समाचार सुन्नुहोस :
काठमाडौँ – सरकारले दक्षिण कोरियामा भाषा र स्नातक तहको अध्ययन गर्न चाहने नेपाली विद्यार्थीलाई दिँदै आएको ‘नो अब्जेक्सन सर्टिफिकेट’ (एनओसी) अस्थायी रूपमा रोक्ने निर्णय गरेको छ। सिओलस्थित नेपाली दूतावासको सिफारिसपछि यस्तो निर्णय गरिएको हो। दूतावासले कन्सल्टेन्सीहरूको प्रभावमा परेर कोरिया पुगेका विद्यार्थीहरू ठगिएको र उनीहरूको समस्या गम्भीर बन्दै गएको भन्दै वैशाख १७ गते परराष्ट्र मन्त्रालयलाई पत्रमार्फत एनओसी बन्द गराउन आग्रह गरेको थियो।
यस निर्णयसँगै यस वर्ष जुन–जुलाई इन्टेकका लागि भाषा अध्ययनको सम्पूर्ण शुल्क बुझाइसकेका गरिब तथा मध्यमवर्गीय विद्यार्थी अन्योलमा परेका छन्। विद्यार्थीको लगानी र समय खेर जाने भन्दै शिक्षा मन्त्रालयमाथि दबाब बढेको छ। यसै कारण शिक्षा मन्त्रालय अर्को इन्टेकदेखि मात्र एनओसी रोक्ने तयारीमा रहेको छ।
शिक्षा मन्त्रालयका प्रवक्ता शिवराम सापकोटाका अनुसार परराष्ट्र मन्त्रालयबाट पत्र प्राप्त भइसकेको छ र त्यसअनुसार कोरियाको एनओसी अस्थायी रूपमा स्थगित गरिएको हो। हालको इन्टेकका विद्यार्थीको अवस्थाबारे शिक्षामन्त्रीलाई जानकारी गराइएको र अन्तिम निर्णय बाँकी रहेको उनले बताए।
