टोकियो – जापानको हालै सम्पन्न एक सरकारी सर्वेक्षणअनुसार देशका करिब ३९ प्रतिशत नागरिकले आफू कहिलेकाहीँ एक्लो महसुस गर्ने गरेको बताएका छन् । एक्लोपन तथा सामाजिक अलगावसम्बन्धी समस्या समाधान गर्न सन् २०२३ को अप्रिलदेखि कार्यान्वयनमा ल्याइएको विशेष कानुनले अझै उल्लेखनीय प्रभाव पारेको देखिएको छैन ।
सन् २०२४ मा गरिएको चौथो राष्ट्रिय सर्वेक्षणमा ‘प्रायः वा सधैं,’ ‘कहिलेकाहीँ,’ वा ‘कहिलेकाँही मात्र’ एक्लो महसुस गर्ने व्यक्तिको संख्या ३९.३ प्रतिशत रहेको उल्लेख गरिएको छ, जुन अघिल्लो वर्षको तथ्यांकसँग समान छ । यो अनुपात सन् २०२१ मा अध्ययन सुरु भएयता प्रायः स्थिर रहँदै आएको छ ।
यसपटकको सर्वेक्षणमा पहिलोपटक स्मार्टफोन प्रयोग र एक्लोपनबीचको सम्बन्ध पनि अध्ययन गरियो । मोबाइल दैनिक आठ घण्टाभन्दा बढी प्रयोग गर्ने व्यक्तिहरूमध्ये १३.३ प्रतिशतले आफू “प्रायः वा सधैं” एक्लो महसुस गर्ने बताएका छन् । सातदेखि आठ घण्टा मोबाइल चलाउने समूहमा यो अनुपात ९.५ प्रतिशत रहेको छ, जुन कम समय मोबाइल प्रयोग गर्नेहरूमध्येभन्दा उच्च हो ।
एक्लोपनको मुख्य कारणका रूपमा सर्वाधिक उल्लेख गरिएको कारण थियो- ‘परिवारका सदस्यको निधन,’ जुन २४.६ प्रतिशत सहभागीहरूले रोजे। अन्य प्रमुख कारणहरूमा ‘एक्लै बस्नु,’ ‘शिक्षा वा रोजगारी परिवर्तन/परित्याग,’ र ‘गम्भीर शारीरिक वा मानसिक स्वास्थ्य समस्या’ समावेश छन् । सहभागीहरूलाई एकभन्दा बढी कारण चयन गर्ने छुट दिइएको थियो ।
सर्वेक्षणका लागि १६ वर्ष वा सोभन्दा माथिका जापानी नागरिकहरूमध्ये २० हजार जनालाई जथाभावी रूपमा छानिएको थियो । अध्ययन सन् २०२४ डिसेम्बरसम्मको सामाजिक अवस्थालाई लक्षित थियो र कुल ५४.४ प्रतिशतबाट मान्य प्रतिक्रिया प्राप्त भएका थिए । कोरोना महामारीपछि सामाजिक अलगाव र मानसिक स्वास्थ्यसम्बन्धी समस्या चुलिँदै गएको निष्कर्ष निकालिँदै आएको छ ।
