टोकियो – दक्षिण कोरियाको एक प्राचीन बौद्ध मन्दिरले १४औँ शताब्दीको बुद्धमूर्ति जापानलाई औपचारिक रूपमा फिर्ता गरेको छ । सन् २०१२ मा चोरी गरी कोरियामा पुर्याइएको उक्त मूर्ति बुसिओक्सा मन्दिरले आफ्नो भएको दाबी गर्दै राखिएको थियो ।
मूर्ति जापानको नागासाकी प्रान्तको त्सुशिमा टापुस्थित कान्नोन्जी मन्दिरबाट कोरियाली चोरहरूले चोरेका थिए । चोरीपछि मूर्ति बरामद गरे पनि बुसिओक्सा मन्दिरले ऐतिहासिक तर्क गर्दै मूर्तिको स्वामित्व आफ्नो भएको दाबी गर्दै आएको थियो । मन्दिरका अनुसार यो मूर्ति शताब्दीयौंअघि जापानी समुद्री डाकाहरूले लुटेर लगेका थिए ।
विवादका बीच दक्षिण कोरियाको अदालतमा मुद्दा चल्यो । सन् २०१७ मा देआजोन जिल्ला अदालतले मूर्ति बुसिओक्सा मन्दिरलाई हस्तान्तरण गर्न सरकारलाई आदेश दिएको थियो । उक्त निर्णयले जापान-दक्षिण कोरिया सम्बन्धमा चिसोपन थपिएको थियो, जुन ऐतिहासिक विषयहरूकै कारण पहिलेदेखि नै संवेदनशील रहेको छ ।
तर सन् २०२३ मा देआजोन उच्च अदालतले जिल्ला अदालतको फैसला उल्ट्यायो । त्यसपछि दक्षिण कोरियाको सर्वोच्च अदालतले पनि उच्च अदालतको निर्णयलाई सदर गर्दै मूर्ति कानुनी रूपमा जापानलाई फिर्ता गर्ने बाटो खोल्यो ।
शुक्रबारदेखि मूर्ति कान्नोन्जी मन्दिरका प्रतिनिधिहरूको जिम्मा लगाइएको हो । मन्दिरले मूर्ति सोमबार औपचारिक रूपमा आफ्नो परिसरमा पुनःस्थापना गर्ने जनाएको छ ।
