समाचार सुन्नुहोस :
काठमाडौं — सभामुख देवराज घिमिरेले देशको समसामयिक राजनीतिक संकट समाधान गर्न नेता परिवर्तन भन्दा बढी जनताको सोचमा परिवर्तन हुनु आवश्यक रहेको बताएका छन्।
शनिबार सिंहदरबारमा पूर्व सांसद मञ्चद्वारा आयोजित “नेपालको वर्तमान अवस्था : चुनौती र समाधान” विषयक एक दिने अन्तरक्रिया कार्यक्रमलाई सम्बोधन गर्दै सभामुख घिमिरेले वर्तमान राजनीतिमा सही र गलत छुट्याउने संस्कार विकास हुन नसकेकोमा चिन्ता व्यक्त गरे।
“हामीले सत्यतर्फ अघि बढ्नुपर्ने हो, तर यथार्थ बुझ्ने र बुझाउने मानसिकता कमजोर बन्दै गएको छ,” घिमिरेले भने। जनताको सोच र व्यवहारमा परिवर्तन नआउँदा गलत प्रचारले नै महत्त्व पाउन थालेको र सही विषय पनि गलतजस्तो देखिन थालेको उनले उल्लेख गरे।
नेता परिवर्तनको प्रक्रिया प्रणालीभित्रबाटै हुने हुँदा, समस्या नेतृत्वमा मात्र नभई सोच र संस्कारमा रहेको स्पष्ट गर्दै उनले देशमा देखिएको अस्थिरता प्रति चिन्ता व्यक्त गरे। साथै, हाल राजनीतिक प्रणालीविरुद्ध भइरहेका गतिविधिहरूप्रति जनताले निगरानीसाथ हेर्नु र सजगताका साथ प्रतिक्रिया दिनु जरुरी रहेको धारणा व्यक्त गरे।
