काठमाडौं – प्रधानमन्त्री केपी शर्मा ओली र नेपालका लागि भारतीय राजदूत नविन श्रीवास्तवबीच शुक्रबार बालुवाटारस्थित प्रधानमन्त्री निवासमा भेटवार्ता भएको छ । भेटवार्तामा भारत-पाकिस्तानबीचको पछिल्लो तनाव, आतंकवाद र क्षेत्रीय सुरक्षाका विषयमा छलफल भएको प्रधानमन्त्रीको सचिवालयले जनाएको छ ।
भारतको पहलगाममा अप्रिल २२ मा भएको आतंकवादी आक्रमणपछि भारत-पाकिस्तान सम्बन्धमा चिसोपन देखा परेको छ । राजदूत श्रीवास्तवले उक्त घटनाक्रमबारे प्रधानमन्त्री ओलीलाई जानकारी गराउँदै भारतले गरेको जवाफी कारबाहीबारे अवगत गराएका थिए । ‘भारतले आक्रमणको जवाफ स्वरूप कारबाही गरेको हो, तर जेट हमला गरिएको भन्ने प्रचार सत्य होइन,’ राजदूत श्रीवास्तवले बताएका थिए ।
भेटका क्रममा राजदूतले घटनाप्रति नेपाल सरकारद्वारा बिहीबार जारी गरिएको वक्तव्यप्रति धन्यवादसमेत व्यक्त गरेका थिए । नेपालले शान्तिपूर्ण कूटनीतिक समाधानको पक्षमा उभिँदै आएको सन्देश उक्त वक्तव्यमा दिइएको थियो ।
प्रधानमन्त्री ओलीले नेपाल विश्व शान्तिको पक्षधर राष्ट्र भएको उल्लेख गर्दै कुनै पनि द्वन्द्वग्रस्त पक्षलाई छिमेकी मुलुकहरूमाथि आक्रमण गर्न आफ्नो भूमिको प्रयोग हुन नदिने स्पष्ट पारे । उनले पहलगाममा भएको आतंकवादी आक्रमणको कडा शब्दमा भत्र्सना गर्दै आतंकवादविरुद्ध नेपालको दृढ अडान पुनः दोहोर्याए ।
