काठमाडौं – नेपालस्थित चिनियाँ दूतावासले आफ्ना नागरिकहरूलाई नेपाल-भारत सीमावर्ती क्षेत्रमा नजान आग्रह गरेको छ । सुरक्षा सतर्कता बढिरहेको जनाउँदै दूतावासले सम्भावित जटिलताबाट जोगिन आग्रह गर्दै सावधानी अपनाउन भनेको हो ।
दूतावासले आफ्ना नागरिकहरूलाई लक्षित गर्दै आफ्नो आधिकारिक वीच्याट च्यानलमार्फत सार्वजनिक गरेको सूचनामा भनिएको छ, ‘नेपाल र भारत दुवैले सीमाक्षेत्रमा सुरक्षा निगरानी कडा बनाएका छन्, त्यसैले व्यक्तिगत लापरबाहीले भारतीय भिसा बिना भारतीय भूमि प्रवेश गर्ने गल्ती नगर्नुहोस् ।’
चिनियाँ दूतावासको चेतावनी यस्तो समय आएको हो, जब हालै केही चिनियाँ नागरिकहरू नेपाल-भारत खुला सीमा हुँदै भारततर्फ प्रवेश गर्ने क्रममा पक्राउ परेका थिए। स्रोतका अनुसार रक्सौल नाका क्षेत्रमा यस्ता घटना दोहोरिने क्रम बढेको छ ।
नेपाल र भारतबीच खुला सीमा व्यवस्था रहेकाले दैनिक सयौँ मानिस आवतजावत गर्छन् । तर हाल भारत-पाकिस्तानबीचको बढ्दो कूटनीतिक तनावका कारण भारतले सीमावर्ती क्षेत्रमा सुरक्षा सतर्कता उच्च बनाएको छ । यसको प्रत्यक्ष असर नेपालसँगको सीमा नाकामा पनि देखिन थालेको छ ।
यस्ता संवेदनशील समयहरूमा विदेशी नागरिकहरू, विशेषगरी बिना भिसा सीमाबाट पार जानेहरूको अवस्थालाई भारतले गम्भीर रूपमा लिने गरेको छ । चिनियाँ दूतावासले त्यही संवेदनशीलतालाई ध्यानमा राख्दै आफ्ना नागरिकलाई चेतावनी दिएको बताइएको छ ।
