काठमाडौं – भारतले पाकिस्तान र पाकिस्तान प्रशासित कश्मीरमा हवाई आक्रमण गरेपछि पाकिस्तानले सशस्त्र बललाई प्रतिकारको अधिकार दिएको छ । पाकिस्तानी प्रधानमन्त्री शहबाज शरीफको कार्यालयबाट जारी आदेशपछि क्षेत्रीय सुरक्षामा थप तनाव पैदा भएको छ ।
द गार्जियनले रोयटर्सलाई उद्धृत गर्दै जनाएको अनुसार प्रधानमन्त्री कार्यालयले सेनालाई ‘प्रतिकारात्मक कारबाही गर्न पूर्ण स्वीकृति’ दिएको छ । भारतले गएको राति पाकिस्तान नियन्त्रणको कश्मीर र अन्य रणनीतिक स्थानहरूमा आक्रमण गरेको थियो ।
आक्रमणलाई भारत र पाकिस्तानबीच दशकौँदेखि चल्दै आएको तनावको सन्दर्भमा अहिलेसम्मकै सबैभन्दा ठूलो सैन्य टकरावको रूपमा लिइएको छ । भारतले नौवटा स्थानमा आतङ्कवादी संरचना ध्वस्त पारेको दाबी गर्दै मुस्लिम अतिवादी समूह जैश-ए-मोहम्मद र लश्कर-ए-तोइबाविरुद्ध लक्षित कारबाही भएको बताएको छ ।
पाकिस्तानी सेनाले आक्रमणको क्रममा पाँच भारतीय युद्धविमान खसेको दाबी गरे पनि भारतीय रक्षा मन्त्रालयले त्यसको पुष्टि गर्न अस्वीकार गरेको छ । पाकिस्तानी सैन्य प्रवक्ताका अनुसार भारतको आक्रमणमा कम्तीमा २६ सर्वसाधारणको ज्यान गएको छ भने ४६ जना घाइते भएका छन् । भारतको आक्रमणपछि पाकिस्तानले गरेको जवाफी कारबाहीमा पनि सात नागरिकको मृत्यु र ३० जना घाइते भएको पुष्टि भएको छ ।
भारतको यो आक्रमण कश्मीरमा आतंकवादीहरूको आक्रमणमा २६ जना पर्यटकको मृत्यु भएको केही हप्तापछि भएको हो । भारतले उक्त आक्रमणको दोष पाकिस्तानस्थित आतङ्ककारी समूहहरूलाई दिँदै आएको छ ।
