काठमाडौं – जम्मु-कश्मीरको पहलगाममा भएको आतंकवादी आक्रमणपछि चुलिएको भारत-पाकिस्तान तनावले नयाँ मोड लिएको छ । भारतीय सेनाले पाकिस्तानमा ‘अपरेशन सिन्दूर’ नाम दिँदै मिसाइल आक्रमण गरेपछि दुवै देशका नागरिकहरू मारिएको पुष्टि हुन थालेको छ । तनाव चर्किएसँगै पाकिस्तानको पञ्जाब प्रान्तमा आम जनसुरक्षालाई ध्यानमा राख्दै सम्पूर्ण विद्यालयहरू बन्द गरिएका छन् ।
पञ्जाबकी मुख्यमन्त्री मरियम नवाज शरीफले विद्यालयसहित विश्वविद्यालय तथा कलेजमा सञ्चालन हुने परीक्षा समेत स्थगित गरिएको घोषणा गरेकी छन् । यद्यपि अन्तर्राष्ट्रिय परीक्षा बोर्डहरूले सञ्चालन गर्ने परीक्षाहरू भने यथावत् सञ्चालन हुने जनाइएको छ ।
सन् २०२५ अप्रिल २२ मा जम्मु-कश्मीरको पहलगाममा पर्यटकमाथिको हमलामा एक नेपालीसहित २६ जनाको ज्यान गएपछि भारतले सो आक्रमणमा पाकिस्तानको संलग्नता रहेको आरोप लगाएको थियो । त्यसैको जवाफस्वरूप भारतले मिसाइल आक्रमण गरेको दाबी गरिएको छ ।
गोलाबारी र विष्फोटले सीमा तनावग्रस्त
समाचार संस्था रोयटर्सका अनुसार पाकिस्तानका सीमावर्ती क्षेत्रमा गोलाबारी र विष्फोटका घटनाहरू भइरहेका छन् । भारतीय सेनाले कश्मीर क्षेत्रमा पाकिस्तानी सेनाको आक्रमणमा परी तीन भारतीय नागरिकको ज्यान गएको पुष्टि गरेको छ ।
उता, पाकिस्तानी सेनाका प्रवक्ता लेफ्टिनेन्ट जनरल अहमद शरीफ चौधरीले बीबीसीसँगको अन्तर्वार्तामा भारतको आक्रमणमा दुई बालबालिकासहित सात जनाको मृत्यु भएको बताएका छन् । उनका अनुसार आक्रमणमा एक मस्जिदलगायत कैयौं सर्वसाधारण क्षेत्रहरू लक्षित गरिएको थियो ।
पाक प्रधानमन्त्रीको कडा चेतावनी
घटनापछि पाकिस्तानका प्रधानमन्त्री शहबाज शरीफले भारतको आक्रमणप्रति कडा प्रतिक्रिया जनाएका छन् । उनले पाकिस्तानले आफ्ना नागरिकहरूको सुरक्षाका लागि भारतीय आक्रमणको निर्णायक जवाफ दिने अधिकार सुरक्षित रहेको स्पष्ट पारेका छन् ।
भारत-पाकिस्तानबीचको सम्बन्ध झनै चिसिँदै गएको अवस्थामा अन्तर्राष्ट्रिय समुदायले संयमता अपनाउन र द्वन्द्वको समाधान संवादबाट गर्न आह्वान गरिरहेका छन् ।
