काठमाडौं – बंगलादेशकी पूर्वप्रधानमन्त्री तथा बंगलादेश नेशनलिस्ट पार्टी (बीएनपी) की अध्यक्ष खालिदा जिया चार महिनाको उपचारपछि मंगलबार बिहान स्वदेश फर्किएकी छन् । लन्डनको एक क्लिनिकमा लामो समयसम्म स्वास्थ्य उपचार गराइरहेकी ७९ वर्षीया जिया बिहान हजरत शाहजलाल अन्तर्राष्ट्रिय विमानस्थल ओर्लिएकी हुन् ।
उनलाई स्वागत गर्न विमानस्थल वरपर बीएनपी नेता तथा कार्यकर्ताहरू ब्यानर, पोस्टर र पार्टीको झण्डासहित उपस्थित थिए । उनकी बुहारी जुबैदा रहमान पनि यसपटक खालिदा जियासँगै बंगलादेश फर्किएकी छन् । झण्डै १७ वर्षपछि जुबैदा बंगलादेश फर्केकी हुन् । उनीहरूका साथ तीन जना निजी चिकित्सक पनि थिए ।
खालिदा जियालाई कलेजो सिरोसिस, मिर्गौला र मुटु सम्बन्धी समस्याहरू रहेका छन्। उनी जनवरी ८ मा उपचारका लागि लन्डन गएकी थिइन् । उनको स्वदेश फर्काइ बंगलादेशको वर्तमान राजनीतिक परिदृश्यमा महत्त्वपूर्ण मोडको संकेतका रूपमा हेरिएको छ । गत वर्ष अगस्टमा छात्र आन्दोलनपछि प्रधानमन्त्री शेख हसिनाको सरकार पतन भएको थियो र त्यसयता नोबेल विजेता डा. मोहम्मद युनुसको नेतृत्वमा अन्तरिम सरकार काम गरिरहेको छ ।
अन्तरिम सरकारलाई निष्पक्ष चुनाव गराएर निर्वाचित सरकारलाई सत्ता हस्तान्तरण गर्ने जिम्मेवारी दिइएको भए पनि हालसम्म चुनावको मिति घोषणा गरिएको छैन ।
