काठमाडौं – नेपाल राष्ट्र बैंकका पूर्व कर्मचारी ऋषिराम बरालले कान्छी श्रीमतीको हत्या गरी आफैले पनि प्राण त्यागेका छन् । पोखराको बिरौटामा नयाँ घर बनाएर कान्छी श्रीमती भित्र्याएको पाँच वर्षमै यस्तो भयावह दुर्घटना निम्त्याएका हुन् ।
सोमबार अपरान्ह श्रीमतीको हत्यापछि गम्भीर अवस्थामा भेटिएका बरालको उपचार क्रममा गए राति मृत्यु भएको हो । उनको हातबाट ३७ वर्षीया देवी पराजुली बराल मारिएकी प्रहरीले जनाएको छ । प्रहरीका अनुसार दुई वटा घरबार गरेका ऋषिरामले कान्छी श्रीमती देवीसँग झगडा परेपछि धारिलो हतियार प्रयोग गरे ।
घटना लगत्तै सो स्थानमा पुगेका तथा अनुसन्धानका जिम्मेवारी लिएका वडा प्रहरी कार्यालय वैदामका डीएसपी सन्तोष निरौलाका अनुसार घटनाको जानकारीपछि प्रहरी टोली पुग्दा श्रीमान-श्रीमती दुवै रगताम्मे अवस्थामा थिए । श्रीमतीको अनुहारमा चोट थियो भने श्रीमानको घाँटीमा । श्रीमतीमाथि आक्रमण गरेपछि उनले पनि आत्महत्या गरेको प्रहरीले जनाएको छ । घटनास्थलमा चक्कु र मेटासिड नामक विषको खाली डब्बा भेटिएको छ ।
जेठी श्रीमती र उनको परिवारसँग नजिकिएको थाहा पाएपछि कान्छीसँग सम्बन्ध बिग्रिएको छिमेकी र आफन्तको अनुमान छ । दुई छोरा, एक छोरी र जेठी श्रीमती पोखराकै मासबारस्थित अर्को घरमा बस्छन् । पाँच वर्षअघि बैंकबाट अवकाश लिएका चालक बरालले निकै कम उमेरकी युवतीलाई श्रीमतीको रुपमा नयाँ घरमा भित्र्याएका थिए ।
