टोकियो – जापानको गोल्डेन विक बिदाको दोस्रो चरणको अन्तिम दिन मंगलबार राजधानी टोकियोसहित प्रमुख सहरहरूमा फर्किने यात्रुको ठूलो भीड देखिएको छ ।
रेल स्टेशन र विमानस्थलहरू बिदा मनाएर फर्किने यात्रुहरूले खचाखच भएका थिए । टोकियोको हानेडा विमानस्थलमा परिवारसहित बिदा मनाएर फर्किने यात्रुहरूको चहलपहल देखिन्थ्यो ।
ओकिनावा प्रान्तमा करिब एक सातासम्म परिवारसँग घुमेका ४० वर्षीय कोहेइ ताकिमोतोले भने, ‘मानसिक र शारीरिक दुवै रूपमा ताजगी महसुस भयो ।’ उनकी ६ वर्षीया छोरी मियुले भनिन्, ‘समुद्रको किनार निकै सुन्दर थियो र म निकै रमाएँ ।’
पश्चिम जापानको जेआर शिन-ओसाका स्टेशन पनि यात्रुहरूले भरिएको थियो । सकाई (ओसाका प्रान्त) स्थित आफ्नो जन्मस्थान भ्रमण गरेर टोकियो नजिकैको कावासाकी फर्किरहेका २४ वर्षीय मसानारी डेगुचीले भने, ‘बिदा लगातार नभएकाले यात्रा अलि कठिन भयो, तर यहाँ आएर आराम गर्न पाएकोमा खुसी लागेको छ ।’
गोल्डेन विकको दोस्रो चरण शनिबारदेखि सुरु भई चार दिन लामो थियो भने पहिलो चरण अप्रिलको अन्त्यतिर परेको थियो ।
