समाचार सुन्नुहोस :
काठमाडौँ – पूर्व प्रधानमन्त्री डा. बाबुराम भट्टराईले सरकारले प्रस्तुत गरेको आगामी वर्षको नीति तथा कार्यक्रमलाई साधारण मात्र भएको, खासै नया नभएको टिप्पणी गरेका छन्। शुक्रबार राष्ट्रपति रामचन्द्र पौडेलले संघीय संसद्को संयुक्त बैठकमा आगामी आर्थिक वर्ष २०८२/८३ को नीति तथा कार्यक्रम वाचन गरेका थिए।
यसप्रति प्रतिक्रिया दिँदै भट्टराईले नीति तथा कार्यक्रम अघिल्ला वर्षहरूको दोहोराइ जस्तो मात्र भएको र उल्लेखनीय नवीनता नभएको बताएका हुन्। ‘बजेटमा कसरी आउँछ हेर्नुपर्छ । अहिलेसम्म दुई अङ्कको आर्थिक वृद्धिदर भएकै छैन । यसलाई हासिल गर्ने गरी नीति तथा कार्यक्रम आउनुपर्थ्यो । आएको देखिएन । सुशासनको क्षेत्रमा भ्रष्टाचारलाई नियन्त्रण गर्ने अङ्गहरूलाई बलियो अङ्ग बनाउँछौँ । सुधार गर्छौँ भन्न सक्नुपर्थ्यो । त्यो नबन्दा यसअघिकै निरन्तरता जस्तै भयो । सामान्य रूपमा पास भयो तर फस्ट डिभिजन आएन’, उनले भने ।
