काठमाडौं – प्रधानमन्त्री केपी शर्मा ओलीले कलाकारले अभिव्यक्त गरेको व्यक्तिगत धारणा मात्रैका आधारमा चरम आलोचना भइरहेको भन्दै गम्भीर असन्तोष व्यक्त गरेका छन् । बिहीबार विराटनगरमा आयोजित कोशी प्रदेशको लगानी सम्मेलनलाई सम्बोधन गर्दै प्रधानमन्त्री ओलीले केही समूहले असहिष्णुता प्रदर्शन गरिरहेको आरोप लगाए ।
‘एक कलाकारले एउटा राजनीतिक विचारको सामान्य समर्थन गरे मात्र भनेर उनलाई सामाजिक सञ्जालदेखि सार्वजनिक मञ्चसम्म जिस्क्याइयो, हेला गरियो,’ प्रधानमन्त्री ओलीले भने, ‘उ त्यो पार्टीको नेता होइन, उ त एउटा कलाकार हो । उसले आफूले अनुभूत गरेको कुरा मात्र भन्यो। त्यो सहन नसक्ने जस्तो व्यवहार देखियो ।’
प्रधानमन्त्री ओलीले पछिल्ला दिनमा कलाकार सुरक्षा पन्तप्रति देखिएको आलोचनालाई पनि असान्दर्भिक र अतिशयोक्तिपूर्ण भएको बताए । ‘एउटा बच्चाबारे सामान्य जिज्ञासामा उनले सकारात्मक प्रतिक्रिया दिएकी थिइन् । भनिन्, ‘गुड लुकिङ हुनुहुन्छ, कला क्षेत्रमा आउनुभयो भने मार्केट जम्छ जस्तो देखिन्छ ।’ अब यस्तो कुरा पनि नबोल्न पाइने ?’ ओलीको प्रश्न थियो ।
प्रधानमन्त्री ओलीले राजसंस्थाको सवाल उठाउँदै कलाकारमाथि गरिएको आलोचना पुरानै पञ्चायती सोचको झल्को भएको बताए । ‘हाम्रो संविधानमा राजसंस्था रहने व्यवस्था नै छैन । त्यो नभएको व्यवस्थाबारे कलाकारसँग सोधिएको थियो, उनले सहजै उत्तर दिइन् । तर त्यसपछि ती कलाकारमाथि जुन किसिमको बहिष्कारको भाषा बोलियो- जस्तो, उसको फिल्म नहेर्नु, गीत नसुन्नु, नृत्य नहेर्नु- त्यो कस्तो असहिष्णुता हो ?’ उनले प्रश्न गरे ।
प्रधानमन्त्री ओलीले विचार, अभिव्यक्ति र कलात्मक स्वतन्त्रताको सम्मान गर्न सबैलाई आग्रह गर्दै यस्ता घटनाले लोकतान्त्रिक मूल्य-मान्यतामाथि आँच पुर्याउने चेतावनी दिए ।
