काठमाडौं – शिक्षक आन्दोलनमा ऐक्यबद्धता प्रकट गर्न पुगेका नेकपा (एकीकृत समाजवादी) का अध्यक्ष माधव कुमार नेपाल र सम्मानित नेता झलनाथ खनाल नाराबाजीपछि धारणा सार्वजनिक नगरी फर्किन बाध्य भएका छन् ।
काठमाडौंमा २७ दिनदेखि जारी आन्दोलनमा समर्थन जनाउन बिजुलीबजार पुगेका उनीहरूलाई शिक्षकहरूले ‘राजनीति नगर’ भन्दै नारा लगाएका थिए । नाराबाजी बढेपछि नेता नेपाल र खनाल आफ्नो मन्तव्य बिना नै प्रदर्शनस्थलबाट फर्किएका हुन् ।
यसअघि सोमबार नयाँ बानेश्वरमा पनि एकीकृत समाजवादीका वरिष्ठ नेता झलनाथ खनाल, उपाध्यक्ष राजेन्द्र पाण्डे र अन्य नेताहरू उपस्थित भएका थिए । त्यहाँ समेत आन्दोलनरत शिक्षकहरूले उनीहरूविरुद्ध नाराबाजी गर्दै संसदमा आफ्नो आवाज उठाउन दबाब दिएका थिए ।
माइकिङमार्फत ‘यहाँ नआउनुहोस्, संसदमा आवाज उठाउनुहोस्’ भन्ने आह्वानपछि नेताहरू प्रदर्शनस्थलबाट बाहिरिएका थिए । बाहिरिंदै गर्दा अध्यक्ष नेपालले छोटकरीमा भने, ‘अरू केही भन्न चाहन्न, हाम्रो ऐक्यबद्धता आन्दोलनसँग छ ।’
