महामन्त्री गगन थापाविरुद्ध अदालतमा मुद्दा दायर

काठमाडौं – नेपाली कांग्रेसका महामन्त्री गगन थापाविरुद्ध अदालत अवहेलनाको अभियोगमा सर्वोच्च अदालतमा निवेदन दर्ता गरिएको छ । अधिवक्ता अनन्तराज लुईंटेलसहितको समूहले थापाको पछिल्लो अभिव्यक्तिलाई लिएर कारबाहीको माग गर्दै निवेदन दर्ता गराएका हुन् ।

सर्वोच्च अदालतका प्रवक्ता अच्युत कुँइकेलका अनुसार यो निवेदनमा प्रारम्भिक सुनुवाइका लागि आगामी मंगलबार मिति तोकिएको छ ।

थापाले केही दिनअघि सार्वजनिक कार्यक्रममा बोल्दै सर्वोच्च अदालतले ‘५२ संवैधानिक पदाधिकारीसम्बन्धी मुद्दा डिल गरिरहेको’ टिप्पणी गरेका थिए । मुद्दाको सुनुवाइ चलिरहेका बेला यस्तो अभिव्यक्ति दिँदा न्यायिक प्रक्रियामा असर पर्ने भन्दै थापाविरुद्ध कारबाही माग गरिएको हो ।