टाेकियाे – मार्च महिनामा र्यान्समवेयर आक्रमणहरूमा ३२% ले गिरावट आएको देखिए पनि, अघिल्लो वर्षको तुलनामा घटनाहरू ४६% ले वृद्धि भएका छन्, जसले साइबर अपराधीहरूको रणनीतिमा आएको परिवर्तनलाई संकेत गर्छ, आक्रमण घटेको होइन ।
रिपोर्ट गरिएको र्यान्समवेयर आक्रमणहरूमा आएको पछिल्लो गिरावट उत्साहजनक देखिन सक्छ, तर विज्ञहरूले यो भ्रामक हुन सक्ने चेतावनी दिएका छन् । NCC समूहकाे तथ्यांकअनुसार मार्च २०२५ मा अघिल्लो महिनाको तुलनामा ३२% कम, कुल ६०० घटनाहरू रिपोर्ट गरिएका थिए ।
तर यो गिरावट वास्तवमा पहिला भएका असाधारण रूपमा ठूला आक्रमणहरूको कारण हो, साइबर अपराधमा वास्तविक कमी होइन । वास्तवमा गत वर्षको मार्चको तुलनामा घटनाहरू ४६% ले बढेका छन्, जसले खतरा अझै बढिरहेको देखाउँछ।
र्यान्समवेयर समूहहरू हराउँदै होइनन्, बरु अझ जटिल र परिष्कृत हुँदै गएका छन्। मार्च महिनामा Babuk 2.0 सबैभन्दा सक्रिय समूहको रूपमा देखा पर्यो, यद्यपि यसको वास्तविकतामा शंका गरिएको छ । सुरक्षा अनुसन्धानकर्ताहरूको विश्वास छ कि यस समूहले पहिलाका डाटा बिचहरूबाट चुहिएको डाटा पुनः प्रयोग गरिरहेको छ, जसमा नयाँ आक्रमण होइन, पीडितहरूलाई मात्र छल्न प्रयोग गरिँदैछ ।
यस्तो रणनीति पहिले LockBit जस्ता ठूला र्यान्समवेयर नेटवर्कहरूमा कानून कार्यान्वयनले हस्तक्षेप गरेपछि देखिएको व्यवहारसँग मिल्दोजुल्दो छ ।
यस खालका आक्रमणले उद्योग क्षेत्रमा सबैभन्दा धेरै असर पर्यो, त्यसपछि उपभोक्तामुखी क्षेत्रहरू प्रभावित भए, भने उत्तर अमेरिका भूगोलको हिसाबले सबैभन्दा धेरै लक्षित बन्यो ।
जसमा झण्डै आधा घटनाहरू यही क्षेत्रमा भएका थिए । विश्लेषकहरूले राजनीतिक तनाव र साइबर कमजोरीबीच विशेषगरी क्यानडालाई प्रमुख निशाना बन्ने अपेक्षा गरेका छन् ।
यसैबीच, साइबर अपराधीहरू अब अनलाइन विज्ञापनमा लुकेको हानिकारक कोड ‘मालभरटाइजिङ’ प्रयोग गर्न थालेका छन्, जसले चुपचाप आक्रमण गर्न सजिलो बनाएको छ। GitHub र Dropbox जस्ता भरपर्दो प्लेटफर्महरूलाई दुरुपयोग गरेर यो प्रविधि बढ्दो छ र अब यसमा जेनेरेटिभ AI उपकरणहरूको प्रयोग पनि भइरहेको छ।
आक्रमणकारीहरूले अब केवल प्राविधिक सीप होइन, AI को प्रयोग गरेर अझ विश्वसनीय र जटिल आक्रमण गरिरहेका छन् । यी रणनीतिहरू अझ परिष्कृत हुँदै गइरहेका कारण, विज्ञहरूले संस्थाहरूलाई सतर्क रहन, खतरा विश्लेषणलाई प्राथमिकता दिन र सहकार्यमा जोड दिन सुझाव दिएका छन्, ताकि यो अस्थिर साइबर वातावरणमा टिक्न सकियोस्।
