समाचार सुन्नुहोस :
काठमाडौँ – धरान–११ मा सडक र ड्रेन निर्माणको विवाद मिलाउन गएका नगर प्रमुख हर्क साम्पाङको उपस्थितिमा भएको झगडामा कुटिएका सन्तोष लिम्बूले इलाका प्रहरी कार्यालय धरानमा उजुरी दिएका छन्। नगरकोट टोल विकास संस्थाका अध्यक्षसमेत रहेका लिम्बूले मेयर साम्पाङ, वडा नं. ११ का अध्यक्ष लोकेन्द्र फागो र समर्थक चङ्खे (जोन लिम्बू)विरुद्ध अभद्र व्यवहारको आरोप लगाउँदै उजुरी दर्ता गरेका हुन्।
विवाद नगरकोट–बानडाँडा सडक स्तरोन्नतिको काम कसको क्षेत्रमा पर्ने भन्ने विषयमा उत्पन्न भएको थियो। प्रदेश सरकारले २० लाख बजेट विनियोजन गरे पनि यो वर्ष केवल माथिल्लो क्षेत्रमै काम हुने भनिएपछि विवाद चुलिएको हो। मेयर साम्पाङ सोमबार आउने भनिए पनि मंगलबार मात्रै निर्माणस्थल पुगेका थिए। सोही क्रममा प्रमुख साम्पाङ र लिम्बूबिच भनाभन भएको थियो। लिम्बूले आफू नागरिक भएको बताएपछि मेयरले उनको हैसियत सोध्दै आक्रोश व्यक्त गरेका थिए। त्यसपछि समर्थक चङ्खेले लिम्बूमाथि हातपात गरेका थिए।
साम्पाङले घटनामा मौन बसेको भन्दै लिम्बूले कानुनी उपचार खोज्दै दोषीमाथि कारबाहीको माग गरेका छन्। लिम्बूकै पहलमा सो बजेट वडा नं. ११ मा आएको हो।
