समाचार सुन्नुहोस :
काठमाडौँ – ब्राजिलियन लेजेण्ड फुटबल खेलाडी रोबर्टो कार्लोस नेपाल सुपर लिग (एनएसएल) हेर्न आज काठमाडौं आइपुगेका छन्। त्रिभुवन अन्तर्राष्ट्रिय विमानस्थलमा एनएसएल आयोजक टोलीले उनलाई विशेष स्वागत गरेको हो।
कार्लोस एनएसएल आयोजकको निमन्त्रणामा नेपाल आएका हुन्। विमानस्थलमा सञ्चारकर्मीहरूसँग कुरा गर्दै उनले नेपाल आउन पाउँदा निकै खुशी लागेको बताए। साथै, उनले नेपालमा रहेका ब्राजिलियन फुटबल समर्थकहरूलाई धन्यवाद पनि दिए। उनले बुधबार दशरथ रंगशालामा हुने एनएसएलको दोस्रो क्वालिफायर खेल हेर्ने कार्यक्रम रहेको छ। उक्त खेल पोखरा थन्डर र धनगढी एफसीबीच हुनेछ।
रोबर्टो कार्लोस विश्व फुटबलका इतिहासमै एक प्रमुख डिफेन्डरको रूपमा चिनिन्छन्। सन् २००२ मा ब्राजिलले विश्वकप जित्दा उनी टोलीका प्रमुख खेलाडी थिए। त्यसअघि सन् १९९८ को विश्वकप फाइनलमा पनि उनी ब्राजिल टोलीमा मुख्य स्थानमा थिए। उनको नेपाल आगमनले एनएसएलमा थप उत्साह थपिएको छ भने नेपाली फुटबलप्रेमीहरूलाई ऐतिहासिक क्षणको अनुभव दिलाउने अपेक्षा गरिएको छ।
