काठमाडौं – जापानमा अध्ययन तथा रोजगारीका लागि गएका नेपालीहरूका समस्या र चुनौतीबारे छलफल गर्न अभिभावक र विद्यार्थीबीच विशेष अन्तरक्रिया कार्यक्रम आयोजना गरिएको छ । कार्यक्रमको आयोजना हनामिजुकी ट्रेनिङ प्रालिले गरेको हो, जसले जापानमा रहेका नेपालीहरूलाई छात्रवृत्ति, रोजगारको अवसर, आर्थिक सहयोग र परामर्श सेवा सम्बन्धी जानकारी उपलब्ध गराएको छ ।
कार्यक्रममा हनामिजुकीका संस्थापक अध्यक्ष विनोद आचार्यले वैदेशिक अध्ययन र रोजगारीको बाटो सधैं सजिलो नहुने भन्दै भने, ‘विदेशमा असहज परिस्थितिलाई कसरी सामना गर्ने र यस्तो बेलामा सहयोगी संस्था वा व्यक्तिसँग कसरी जोडिने भन्ने कुरा अत्यन्तै आवश्यक छ ।’
उक्त संस्था जापान-नेपाल सरकारबीचको ‘जिटुजी सम्झौता’ अन्तर्गत नेपाली कामदारलाई ‘फ्रि भिसा’मार्फत जापान पठाउने पहिलो कम्पनी हो। हालसम्म हनामिजुकीमार्फत २५ सय हाराहारी नेपाली जापान पुगेका छन् ।
जापानी नागरिक एचुको कानेको, ओनो खाजुओ र रिए उएनोले जापान जान चाहने नेपालीहरूलाई समयमै यथोचित तयारी गर्न सुझाव दिए । ‘नेपालीहरू उज्वल भविष्यको सपना बोकेर ठूलो लगानीसहित जापान आउँछन्, तर यहाँ आएपछि अनपेक्षित चुनौतीहरू आउन सक्छन्,’ उनीहरूको भनाइ थियो ।
कार्यक्रममा विश्वविद्यालय अनुदान आयोगका पूर्व सचिव डा. होमनाथ भट्टराई र राष्ट्रिय योजना आयोगका पूर्व सदस्य प्रा.डा. शिवकुमार राईले पनि जापान पुग्दैमा सफलता प्राप्त हुने भन्ने भ्रमबाट विद्यार्थी र अभिभावक दुवै सचेत हुनुपर्नेमा जोड दिए ।
यसै अवसरमा ‘कानेको अवार्ड’ अन्तर्गत ‘जापान-नेपाल फ्रेण्डसिप छात्रवृत्ति’ को घोषणा पनि गरियो । यो छात्रवृत्ति जापानी नागरिक एत्सुको कानेकोले स्थापना गरेको १ करोड १० लाख रूपैयाँको कोषबाट सञ्चालित हुनेछ । नेपाल संयोजक प्रकाश आचार्यका अनुसार, यसवर्ष नेपालका पवन मगर, अमृता लामा तामाङ (जिरेल), खगेस्वरी कुमारी रावत र जापानकी पूर्णिमा मरासिनीले जनही एक लाख रूपैयाँको छात्रवृत्ति प्राप्त गरेका छन् ।
