समाचार सुन्नुहोस :
काठमाडौँ – शनिबार अमेरिकाका विभिन्न सहरहरू—न्युयोर्क, वासिङ्टन लगायतमा हजारौं नागरिकले पूर्वराष्ट्रपति डोनाल्ड ट्रम्पको विरुद्धमा दोस्रो चरणको व्यापक विरोध प्रदर्शन गरेका छन्। प्रदर्शनकारीहरूले ट्रम्पका कठोर नीतिहरूको आलोचना गर्दै ‘अमेरिकामा राजा हुँदैनन्’ र ‘अत्याचारको प्रतिरोध गरौँ’ भन्ने नारासहित न्यूयोर्कको केन्द्रीय पुस्तकालय अगाडि भेला भएका थिए।
आप्रवासन नीतिप्रति असन्तुष्टि जनाउँदै उनीहरूले “नो आइसिई, डर छैन, आप्रवासीहरूलाई यहाँ स्वागत छ” भन्ने नारा लगाएका थिए। आप्रवासन र भन्सार प्रवर्तन एजेन्सी (ICE) को गतिविधिको विरोधमा प्रदर्शनकारीहरूले कागजातविहीन आप्रवासीहरूको निष्कासनप्रति गम्भीर आपत्ति जनाए।
वासिङ्टनमा ह्वाइट हाउसअगाडि उभिएर ४१ वर्षीय बेन्जामिन डगलसले ट्रम्प प्रशासनले कानुनी शासन र संवैधानिक अधिकारमाथि आक्रमण गरिरहेको आरोप लगाए। प्यालेस्टिनी समर्थक विद्यार्थी महमुद खलिलको रिहाईको माग गर्दै डगलसले ट्रम्प प्रशासनलाई विदेशीप्रति घृणा फैलाउने प्रयास र कानुनी अधिकारहरू कमजोर पार्ने खेलमा संलग्न भएको बताए।
न्युयोर्कमा प्रदर्शनमा सहभागी भएकी ७३ वर्षीया क्याथी भालीले ट्रम्पलाई “हिटलरभन्दा मूर्ख” भन्दै चेतावनी दिइन् कि उनी एक विभाजित टिमद्वारा प्रयोग भइरहेका छन् र अमेरिकामा खतराको संकेत स्पष्ट देखिन थालेको छ।
