समाचार सुन्नुहोस :
काठमाडौँ – नेपाल उद्योग वाणिज्य महासंघका अध्यक्ष चन्द्रप्रसाद ढकालले विदेशमा रहेका नेपालीलाई नेपालमै लगानी गर्न आह्वान गरेका छन्। कतारको दोहामा आयोजित बागलुङ सेवा समाज कतारको प्रथम अधिवेशनलाई सम्बोधन गर्दै उनले नेपालमा प्रशस्त लगानीको सम्भावना रहेको बताए।
ढकालले नेपालमा केही छैन भन्ने नकारात्मक धारणा गलत भएको उल्लेख गर्दै, “विदेशमा जस्तो मेहनत नेपालमा गरे धेरै सम्भावना छन्,” भने। उनले नेपालमा लगानीको वातावरण निर्माण भइरहेको भन्दै वैदेशिक रोजगारमा रहेका नेपालीलाई त्यसमा सहभागी हुन आग्रह गरे। उनले रु १० अर्ब पुँजीसहित स्थापना गरिएको नेपाल डेभलपमेन्ट कम्पनीमार्फत जलविद्युत्, पर्यटन, उद्योगलगायत क्षेत्रमा लगानी गरिने जानकारी दिए। यस कम्पनीले विदेशमा रहेका नेपालीहरूको पुँजी सङ्कलन गरी नेपालको विकासमा लगानी गर्ने उद्देश्य लिएको छ।
कार्यक्रममा ढकालले बागलुङवासीले अक्षयकोष स्थापना गरेर सामाजिक उत्तरदायित्व निर्वाह गरेकोमा प्रशंसा गर्दै सो कोषमा रु १५ लाख सहयोग गर्ने घोषणा पनि गरे। कार्यक्रममा बागलुङसम्बद्ध व्यक्तिहरूबाट उनलाई सम्मान प्रदान गरिएको थियो।
