काठमाडौं – चैत १५ गते तीनकुनेमा भएको राजावादी आन्दोलनका क्रममा पक्राउ परेका राप्रपाका महामन्त्री धवल शमशेर राणालाई रिहा गर्ने तयारी गरिएको छ । गृह मन्त्रालय स्रोतका अनुसार राणाको स्वास्थ्य अवस्थालाई ध्यानमा राख्दै उपचारका लागि अस्थायी रूपमा रिहा गरिने निर्णय लिइएको हो ।
राणाको परिवारले गृह मन्त्रालयमा उपचारको व्यवस्था गर्न छुट दिन आग्रह गर्दै निवेदन दिएको थियो । मन्त्रालयले उनलाई बोलाएको समयमा उपस्थित हुने सर्तमा रिहा गर्न लागिएको बताइएको छ । तीनकुनेमा चैत १५ गते भएको हिंसात्मक प्रदर्शनपछि राप्रपाका वरिष्ठ उपाध्यक्ष रवीन्द्र मिश्र, महामन्त्री राणा र अन्य नेता तथा कार्यकर्ता पक्राउ परेका थिए ।
उक्त दिनै पक्राउ परेकाहरूलाई पहिलोपटक अदालतले पाँच दिनका लागि हिरासतमा राख्न अनुमति दिएको थियो । त्यसपछि क्रमशः चैत २० गते थप ६ दिन र अन्ततः चैत २६ गते १५ दिनको म्याद थप गरिएको थियो । अहिले भने स्वास्थ्य कारण देखाउँदै राणालाई अस्थायी रूपमा रिहा गर्ने प्रक्रिया अघि बढाइएको हो ।
