टोकियो – कहिलेकाहीँ सानो गल्तीको मूल्य यति भारी पर्न सक्छ कि जीवनभरको इमानदारीले पनि ढाक्न नसक्ने हुन्छ । जापानको क्योटो सिटीका एक चालकले नसोकेकै सजाय भोगे । २९ वर्षदेखि निष्ठापूर्वक बस सेवा गरेका चालकलाई ७ अमेरिकी डलर (झन्डै १ हजार येन) चोरीको आरोपमा बर्खास्त गरिएको छ, जसले गर्दा उनले ८४ हजार अमेरिकी डलर (१ करोड २० लाख येन) बराबरको अवकाश सुविधा गुमाएका छन् ।
सन् २०२२ मा घटेको यो घटना क्योटो सिटीको सार्वजनिक बसमा सुरक्षा क्यामेराबाट देखिएको थियो । पाँच यात्रुको समूहले १ हजार १५० येन भाडा तिर्नुपर्नेमा चालकले उनीहरूलाई सिक्का बाकसमा १५० येन हाल्न भने र बाँकी १ हजार येनको नोट आफैंले राखेको आरोप लागेको थियो ।
शुरुमा ती चालकले आफ्नो पक्षमा जिल्ला अदालतको फैसला जितेका थि ए। तर नगर कार्यालयले पुनरावेदन गर्दै मुद्दालाई सर्वोच्च अदालतसम्म पुर्यायो । अन्ततः सर्वोच्च अदालतले नगर कार्यालयकै पक्षमा निर्णय दिंदै चालकको बर्खास्ती र अवकाश सुविधा खारेज गर्ने निर्णयलाई सदर गर्यो ।
सर्वोच्च अदालतले भनेको छ, ‘उक्त कर्मीको आचरणले सार्वजनिक यातायात प्रणाली र सेवाप्रतिको जनविश्वासमा गम्भीर असर पार्न सक्थ्यो ।’ अदालतको ठम्याइअनुसार इमानदारी र जवाफदेहिताको मर्मलाई ध्यानमा राख्दै निर्णय लिइएको हो ।
क्योटो सिटीको सार्वजनिक यातायात ब्यूरोका अधिकारी शिनिची हिराईले भने, ‘हाम्रा बस चालकहरू एक्लै काम गर्छन् र जनताको पैसासँग सिधा सरोकार राख्छन् । यदि हामीले यस्ता घटनालाई हल्का रूपमा लियौं भने संस्थागत लापरवाही मौलाउने खतरा हुन्छ । जनविश्वास नै हाम्रो सबैभन्दा ठूलो पूँजी हो ।’
यस घटनाले जापानजस्तो कडा कार्यनैतिकता भएको देशमा समेत एकछिनको कमजोरीले कसरी वर्षौंको मेहनत गुम्न सक्छ भन्ने स्पष्ट गरेको छ । निष्ठा र अनुशासनको मूल्य अत्यन्तै उच्च हुने यो सन्देशसँगै अब जापानमा सार्वजनिक सेवा क्षेत्रमा इमानदारीको मापदण्ड झन् कडाइका साथ लागू हुने देखिएको छ ।
