काठमाडौं – सुमधुर स्वरका धनी गायक तथा सर्जक कुमार पुन मगरले आफ्नो नयाँ लोकपञ्चेबाजा गीत ‘मयाली…’ सार्वजनिक गरेका छन् । नेपाली मौलिकतालाई उजागर गर्ने गीतलाई कुमार पुनको आधिकारिक युट्युब च्यानलमार्फत सार्वजनिक गरिएको हो ।
गीतमा कुमार पुनलाई लोकगायिका मन कुमारी छन्त्यालले सुमधुर स्वरमा साथ दिएकी छन् । लोकसाँगीतिक स्वाद भरिएको ‘मयाली’ गीतमा बाग्लुङको निसिखोला क्षेत्रका सुरम्य गाउँघर, हरियाली डाँडाकाँडा र मौलिक जीवनशैलीलाई मनमोहक शैलीमा प्रस्तुत गरिएको छ । यही कारण, गीतले आफ्नोपनको स्पर्श गराउँछ र दर्शकलाई गाउँले माटोको सुगन्ध महसुस गराउँछ ।
विवेश बुढा मगरको निर्देशनमा बनेको भिडियोमा ज्योती थापा मगर र समिर भण्डारीको जीवन्त अभिनय देख्न सकिन्छ । ग्रामीण परिवेश, स्थानीय नाचगान र प्रेमिल दृश्यहरूलाई जोड्दै तयार पारिएको भिडियोमा युवायुवतीबीचको प्रेम संवाद र मनछुने क्षणहरूलाई कलात्मक ढंगले उतारिएको छ ।
गीतले पञ्चेबाजाको धुनमा आधारित भएर नेपाली संस्कृतिको मौलिक पक्ष झल्काएको छ । स्थानीय संस्कृति, पहिचान र संगीतप्रतिको मोह भिडियोका हरेक फ्रेममा झल्कन्छ । लोकपारखी दर्शक तथा श्रोतामाझ यो गीत लोकप्रिय हुने अपेक्षा गरिएको छ ।
