टोकियो – एभरेष्ट इन्टरनेशनल स्कुल जापानको बिस्तारित चौथो शाखा आराकावा क्याम्पसमा यहि अप्रिल २१ बाट पढाई सुरु हुने भएको छ ।
त्यसका लागि स्कुलले टाढा पर्ने विद्यार्थीहरुका लागि ओकुबोबाट बस सेवाको ब्यवस्था गर्ने भएको छ । जसअनुसार ओकुबो, उएनो, निप्पोरी, निशी निप्पोरी, ताबाता, माचिया हुँदै आराकावा पुग्ने रुट निर्धारण गरिएको छ ।
हाललाई नर्सरी तहदेखि पाँच कक्षासम्म पढाई हुने गरी ब्यवस्था मिलाईएको स्कुल ब्यवस्थापनले जनाएको छ । एभरेष्ट इन्टरनेशनल स्कुल जापानको प्रि-स्कुल एभरेष्ट किड्स ओकुबोमा, कक्षा १ देखि ३ सम्म आशागाया क्याम्पसमा र कक्षा ४ देखि कक्षा १२ सम्म ओगिकुबो क्याम्पसमा पढाई भईरहेकोमा यसै शैक्षिक सत्रदेखि आराकावा क्षेत्रमा बसोबास गर्ने नेपालीहरुको बाक्लो उपस्थितिलाई ध्यानमा राख्दै प्रि-स्कुलदेखि कक्षा ५ सम्म आराकावा क्याम्पस सञ्चालन गर्न लागेको नवगठित सञ्चालक समितिका अध्यक्ष किरणविक्रम थापाले समुद्रपारिलाई बताउनुभयो ।
ओकुबोस्थित एभरेष्ट किड्समा सिट क्षमताका कारण भर्ना गर्न नसकिएका नानीबाबुहरुलाई पनि आराकावामा ब्यवस्थापन गर्ने गरी स्कुल बसको ब्यवस्था मिलाईएको प्रिन्सिपल बिष्णुप्रसाद भट्टले बताउनुभयो ।
एभरेष्ट इन्टरनेशनल स्कुल जापानको बिस्तारित चौथो शाखा आराकावा क्याम्पसको औपचारिक उदघाटन समारोह भने आगामी मे महिनाको १७ तारिख गरिने तय भएको इआइएसजे कम्पनी प्रमुख दिपक सुबेदीले जानकारी दिनुभयो ।
स्मरण रहोस्, गत अप्रिल ६ मा सम्पन्न सातौ अधिवेशनले स्कुलको सञ्चालक समितिको अध्यक्षमा किरणविक्रम थापालाई र कम्पनी प्रमुखमा दिपक सुबेदीलाई नयाँ जिम्मेवारी दिईएको हो ।***
